Kona-bá 25 pursentu ne'ebé sei falta, nia dehan, ne'e foka ba populasaun sira ne'ebé hela sa'e ba foho leten hanesan Bubolita, Digamasi Luruboru, aldeia Loro sa'e, inklui aldeia Oscaiwa, ida ne'e mak ohin loron sei enfrenta problema bee mos.
"Ko’alia kona-ba bee-moos iha suku neen, mezmu iha foho no iha tasi, ita kuandu ko’alia karik dehan ida ne'e tau tiha ba 75 pursentu, " nia hateten ba www.tempotimor.com iha rezidénsia Matahoi postu administrativu Uatulari Munisipiu Viqueque, Sábadu (26/12).
Maski nune'e, administradór ne’e mós espera katak, agora mak bee mós seidauk to'o iha ne'eba, maibé ba oin fiar katak buat hotu sei dezenvolve to'o iha área ne'eba.
Nia parte lamenta oitoan tanba tinan barak ona Instalasaun bee moos ba suku, parte husi Servisu Agua no Saneamentu (SAS) la halo manutensaun maibe povu mak halo fali manutensaun.
Nia fó ezemplu hanesan kanalizasaun bee moos ba suku Makadike ne'e liga husi Mosoata, no Darabai liga husi Edemumu, no Babulu kraik mos liga husi Kabaria, no Babulu leten ho Afaloicai leten liga husi Uamanu, ho ida ne'e ligasun bee moos hirk ne'e kuaze dada distansia naruka tanba ne'e presiza ema atu halo manutensaun kada tinan nune'e oinsa garante bee-moos ba populasaun.
Kona-bá ahi eletrisidade ne'e nia haktuir, ba suku neen iha postu Uatulari foin mak atinji pursentu 75.
"Kona-ba ahi eletrisidade mai ami Uatulari, ha’u labele hateten dehan governu uluk halo governu ida ne'e la halo, maibé husi primeiru governu to'o mai governu ida ne'e, eletrisidade ne'e ha’u bele dehan to’o ona pursentu 75," autoridade lokál ne’e rekoñese. (*)