Hatán ba situasaun ne'e maka iha sesta (11/12) Uniaun Europeia (UE) hamutuk ho autoridade munisípiu Díli lansa projetu ho naran "inisiativa reziliénsia urbana iha Maloa" hodi hadook komunidade husi risku dezastre.

Embaixadór Uniaun Europeia iha TL, Andrew Jacobs hateten, obejetivu husi projetu ne'e atu halo jestaun ba mota Maloa, halo redusaun ba rísku dezastre no mudansa klimátika.

"Jestaun ba lixu no haforsa ekonomia lokál liu-liu hasae konsiénsia komunidade sira nian ba proteze meiu ambiente iha arredóres mota ninin", Embaixadór Andrew Jacobs hateten hafóin lansa projetu iha administrasaun munisípiu Díli, Kinta (11/12).

Nia hatutan, projetu ne’e nu’udár mós kontinuasaun husi projetu ne'ebé uluk sira fó ba fundasaun Săo Paulo ne'ebé implementa iha Dare ho atividade fórmasaun ba komunidade hodi aprende prátika agrikultura hodi proteze meiu ambiente iha fóho lolon.

Projetu ne'e finansia husi Uniaun Europeia ho montante orsamentu hamutuk millaun $2 no sei implementa direta husi ONG Mercy Corp.

Prezidente Autoridade munisípiu Díli, Gaspar Soares konsidera programa ne'e importante tebes tanba bele ajuda hadook komunidade sira husi risku dezastre.

Nia esplika, fóku husi programa refere mak atu haree liu ba situasaun iha mota Maloa nian kona-ba jestaun bee iha mota Maloa oinsá sulin bele ho di'ak.

"Haree ba importánsia husi programa ida ne'e, ou áreas ne'ebé maka iha, tempu badak atu implementa, maka munisípiu suporta teb-tebes programa ida ne'e, no espera katak ho programa ida n'ee bele ajuda halo mudansa la hadi'a situasaun balun iha mota Maloa", nia hateten.(*)