Koordenadór KIDA Agostinho Grigório Ramos hateten, ekipa mai reprezenta destradu hotu-hotu ne'ebé namkari iha teritóriu laran tomak ne'ebé uluk ba destera iha Atauro 1980-1987 ninian.
"Ami hotu ekipa ida nee hetan orgullu boot husi PR Lú Olo simu ami nia pedidu, ohin ami mai halo audénsia iha fatin ida nee, tanba KIDA hamriik atu re-organiza fila fali destradu Atauro atu bele valoriza fila fali resistensia destradu Atauro nian atu bele kontribui no hametin KIDA nia istória, nune'e kontribui ba dezenvolvimentu Timor Leste," Koordenadór KIDA hateten hafoin audiénsia ho PR Lú Olo iha Palásiu Prezidensiál bairru-pite, Segunda (14/12).
Nia mós dehan, destradu Atauro mai husi forsadamente ida ne'ebé halo iha 1980-1983 halo ba familia sira ne'ebé liga ba Falintil ka gerileiru sira iha 1980-1987.
“Ami apela mós ba eis destradu hotu-hotu bele hakmatek iha ida-idak nia munisipiu no postu iha tempu badak nia laran Komisaun Sentrál KIDA nian sei tun too iha munisipiu ida-idak no postu ida-idak atu bele re-organiza prepara ba kongressu nasionál iha tinan oin mai,” nia apela.
KIDA sei realiza kongresu ida atu harii organizasaun rezisténsia destradu Atauro 1980-1987, entaun liuhusi komisaun ida ne'e sei halo kongressu iha meiu 2021.
Entretantu Komisaun Instladora Destradu Atauru estabelese ona iha Dili iha 23 Fevereru 2020, depois de ida ne'e iha situasaun Covid-19, nune'e liu tiha fulan hira mak komisaun halo planu no programa, halo tarefa servisu iha 27 Setembru 2020, halo lansamentu ba tarefa servisu ne'ebé loke husi Prezidente Administrasaun Konsellu Kombatentes Libertasaun Nasionál (PA-KKLN) Riak Leman.
Koordenadór ne'e mós afirma, tarefa servisu KIDA distribui ona ba munisipiu hotu-hotu, liuhusi vokal point sira ne'ebé indika iha kada munisipiu. Tanba dadaun ne'e tuir dadus vervalmente katak, timoroan sira ne'ebé ba kastigu iha Atauro ne'e liu ema na'in 7.000 husi munisipiu 12.
Hafoin ekipa KIDA hasoru malu ho PR Lú Olo ne'e hetan apresiasaun husi xefe estadu ba planu programa sira ne'ebé ekipa KIDA prepara ba kongresu nasionál ne'ebé sei hala'o iha tinan oin.(*)
