Ho volume bee-mota ne’ebé maka’as, nu’udar konsikuensia husi udan boot ne'ebe nunka para, konsege halibur bee hodi taka tomak ponte terminal bekora. La'ós ne'e de'it, maibé mota ne'e rasik fukit hotu ai-hun boot, inklui ai-hun ida, ne’ebé lori husi foho leten, satan iha ponte terminal Bekora hodi halo bee salin sai hodi hoban komunidade nia uma iha Sabrakalan to’o Kulau mai to’o Klak Fuik.

Bee ne’e kontinua salin tun ba hoban merkadu modo besik komarak nian no inundasaun tama komunidade nia uma iha aldeia La ses, suku Kamea no hahú sobu terminal Bekora.

Komunidade ne’ebé hela besik mota terminal, Antónino Gomes hatete, mota ne'e nia korente maka’as tebes, ne’ebé la konsege halai tuir ninia fatin maibé sa'e husi ponte leten, hodi sulin tama filafali ba komunidade sira-nia uma.

"Mota ne'e nia korente maka’as, tanba iha foho leten ne'eba ne'e udan boot”, dehan nia ba www.tempotimor.com iha bairo Terminal, Camea, Cristo-rei, Dili, (04/04).

Enkuantu oras ne'e dadaun mota ne'e rasik la halai tuir ona ninia fatin, tanba volume husi mota ne'e kada minutu aumenta bebeik.

Ho natureza refere, sai hanesan lenbransa ida, redere ba akontesimentu inundasaun iha tinan 2020, udan boot taka tomak ponte Maufelo nian, ne’ebé halo komundiade barak mak sai vítima.

"Ne’ebé agora dadaun, polísia sira mak mai uluk, ona hodi haree halo atuasaun ba movimentu transporte rodaviaria inklui tranporte públiku”, dehan nia.

Enkuantu to'o notísia ne'e hatun www.tempotimo.com, seiduak bele asesu dadus lolos kona-ba uma hira mak sai vítima ba mota terminal bekora ne'e.(*)