Ho udan boot ne’e halo komunidade iha Kapital Nasaun kuaze la sai husi uma iha loron domingu (04/04) dader, tanba udan ne’ebé la para halo komunidade sira iha Fatuhada mós bee konsege tama uma laran.

Nomós iha estrada diresaun Hudilaran ba Delta mós bee konsege liu estrada no halo transporte sira labele halo movimentu, tanba bee ne’e rasik sa’e kuaze 30 sentemetru. Aliende ne’e mosu mós iha parte Bairopite ne’ebé Mota maloa tama mos iha estrada.

Kliner Prizaun Bekora, Paulina da Silva nu’udar vítima haktuir, udan boot ne'ebé monu rai, hahú husi tuku 2 to'o tuku 4, para tiha, pois mai kontinua filafali iha tuku 6 kalan, to'o tuku 6 domingu madrugada, hamosu inundasaun maka’as ba sira-nia uma.

Ho inundasaun ne'e difikulta sira labele toba to'o rai loron, pior liután, tenke hader hodi asegura sira-nia sasán hanesan dokumentu, inklui nesesidade inportante hahán, bikan-kanuru, valde, inklui masa ba fatin sira ne’ebé maran.

"Hori-kalan ha'u preokupa los, ha'u la toba, e ha'u mós ba fanu hau-nia-oan na’in-5, hodi hader ajuda haree sasán prioridade sira, hodi rai hamutuk tiha iha fatin ne’ebé mak konsideran maran”, dehan nia ba www.tempotimor.com iha prizaun Bekora, aldeia has laran suku Camea, Postu Administrativu Cristo-Rei Munisípiu Dili, domingu (04/04).

Kestaun inundasaun ne'e, la'ós foin mak dala-ida ne'e, maibé ne'e akontese bebeik ona, wainhira udan mai la para.

Tanba iha prizaun laran, moru haleu metin no iha ne'eba mós valeta ku'ak ida de'it, wainhira udan tu'un la para, konserteza volume be mós sa'e maka’as entaun difísil para bee sai lalais.

Tuir observasaun jornalista www.tempotimor.com iha terenu nota katak, la'ós de'it udan-bot , maibé mós akompana ho anin boot, no forsa husi natureza ida ne'e konsege, hamosu inundasaun, no hatohar ai-hun boot ida iha areadores prizaun bekora nian.(*)