“Natal nu'udar tempu di'ak ida atu tulun malu, ajuda maun alin sira ne’ebé merese duni atu hetan apoiu, entaun oportunidade ida ne’e ha’u apresia no orgullu ba madre Alma sira tanba sira halo karidade hodi fó tulun ba ema kbi’it la’ek sira, liuhusi oferese prezente Natal hanesan fós no supermie ba maun alin sira iha ne'e”, dehan Euclides Belo iha ambitu natál hamutuk ho komunidade kbi’it laek sira iha Badut Mean, domingu (26/12).

Ema hotu hatene madre sira servisu iha vida espiritual no sira la manán osan, la halo to’os no natar maibé iha tempu difísil hanesan ne’e Igreja liuhusi Madre sira ho fuan boot hola parte hotu hodi ajuda komunidade iha área rurál.

"Nune'e ita agradese no apresia tebes, tanba dalan ba área badut mean ne'e kotu no provizóriu karreta labele liu tanba mota ki’ik oan ne’ebé kompaña ateru bee lori tiha sorin, nune'e UPF halo patrulla mós tenke la'o ain ho distansia ida ne’ebé dook tebes, maibé tanba domin ne’ebé klean husi madre Alma sira ba komunidade kbi’it la’ek iha área izoladu fronteira hodi fó apoiu ai-hán liuhusi UPF entaun ami hatutan hela ba sira”, informa nia.

Entretantu Komandante UPF lori madre Alma sira-nia naran hato’o boas festas santu natal no ksolok tinan foun ba komunidade Badut Mean no nia lori nia naran hato’o agradesementu klean ba komunidade sira ne’ebé durante ne’e kolabora di’ak ho UPF. (*)