"Durante situasaun Covid 19, ita husik hela kondutór sira kuaze sira disiplina laiha tiha ona, tanba tuir lei transporte públiku ne'e, tuir lolos labele reben karreta, tanba reben ne'e bandu, inklui la uza farda, nune'e ohin ekipa Tránzitu Dili halo auto stop iha eis merkadu lama hodi foka liuba mikrolete sira ne’ebé reben vidru karreta nian, nomós la uza fardamentu”, dehan komandante Tránzitu Munisípiu Dili, Inspetór Polísia, Domingos Sarmento Gama, iha Merkadu Lama, Kaikoli, kuarta (26/01).
Atividade apreensaun halo, tanba transporte públiku sira hanesan, mikrolete, taxi, no bus kota sira uza reben ne'e bele afeita asidente.
"Ne'e tanba kuandu sira haree rai ladun mós, mak bele hamosu asidente no kuandu envolve asidente ne’e risku boot ba pasajeiru sira-nian vida”, afirma nia.
Tanba ne'e, auto stop ne’ebé halo hodi halo apreensaun ba mikrolete besik 70-resin ne'e viola lei diploma ministerial artigu 8 numeru 4, enkuantu la uza farda viola lei diploma ministerial artigu 14 númeru 4 no 6.
Nune'e apela ba kondutór sira atu kumpri nafatin regra Sinál Tránzitu nian, no labele hein wainhira polísia halo operasaun foin hatais farda, no hasai reben sira ne'e, maibé husu atu kumpri nafatin regra sira ne'ebé iha.
Tanba Polísia Tránzitu Dili sei kontinua halo pasa ravista ba transporte públiku sira ne’ebé uza reben inklui la kondutór la uza farda.
Entretantu aplikasaun koima ba karreta sira ne’ebé uza reben mínimu US$50.00 no másimu US$60.00. (*)