“Konvensaun uluk ami aprova ona tolu, STCW (Standards of Training, Certification and Watchkeeping) , depois MARPOL (The International Convention for the Prevention of Pollution from Ships) ho SOLAS (Safety of Life at Sea), agora ne'e iha konvensaun ida atu kompleta, ne'e mak hanesan regras sira iha tasi laran ne'e, hanesan ida-idak ninia jalur, kuandu jalur hanesan besik malu ona, atu soke malu ne'e tenke iha sinál”, dehan Prezidente Komisaun B, José Agustinho Sequeira ‘Somotxo Matar Mimiraka’ ba www.tempotimor.com iha Parlamentu Nasionál (PN), kinta (17/03).

Ba Konvensaun ne'e, dadauk komisaun B hein hela, prezensa deputadu sira-nian bainhira prienxe ona koru deliberativu komisaun nian mak sira foin bele aprova.

“Se la'e mós ohin labele aprova, se ohin aprova konserteza ke ohin kedas submete ba DIPLEN para semana oin bele ajenda”, hatete nia.

Ho konvensaun ne'ebé komisaun B prepara ne'e sai hanesan sistema song ka sinál ida atubele regula transporte marítima oinsá mak ró labele soke malu iha tasi laran.

“Ida ne'e, kompletu para ró labele soke malu, e komunikasaun sira ne'e hotu mak agora ami aprova relatóriu pareser, ne'ebé atu sai hanesan konvensaun ida ne'ebé bolu dehan evita ró soke malu iha tasi laran”, hatete nia.

Iha loron 21 fulan-fevereiru tinan 2022, Parlamentu Nasionál, liuhusi plenária ratifika konvensaun internasionál tolu iha área marítima, nune’e Repúblika Demokrátika Timor-Leste adere ba konvensaun refere iha área atividade ekonómika.

Proposta rezolusaun PN númeru 5/V(4ª), kona-ba adezaun Timor-Leste konvensaun internasionál ho norma formasaun, sertifikasaun servisu kuadru ba máritimu 1978 (STCW) no respetiva emenda, aprova ho rezultadu votasaun a-favór 47, kontra 0 no abstensaun 0.

Nune'e mós Proposta rezolusaun PN númeru 6/V(4ª), kona-ba adezaun Timor-Leste konvensaun internasionál ba prevensaun poluisaun hosi ró 1973, ho nia protokolu, anexu emenda (MARPOL) no proposta rezolusaun PN númeru 7/V(4ª), kona-ba adezaun Timor-Leste konvensaun internasionál ba salvaguarda vida umana iha Tasi, 1974 no respetivu protokulu 1978 (SOLAS), ho votu hanesan a-favór 48, kontra 0 no abstensaun 0.

Konvensaun MARPOL ho objetivu, atu penaliza atividade ekonómiku movimentu liuhusi tasi ne'ebé mak hamosu poluisaun barak ba ambiente iha tasi laran, liliu asegura ró ruma hetan asidente durante sira-nia atividade iha tasi.

Atu nune'e Ministériu Transporte no Telekomunikasaun (MTK) bele orienta tékniku sira hetan formasaun no servisu hamutuk ho Unidade Polísia Marítima (UPM), protesaun sivíl prepara kondisaun bainhira iha asidente ruma atua iha tasi.

Kona-ba konvensaun SOLAS atu halo inspesaun ba ró sira ne’ebé hala’o atividade mai iha tasi Timor, atubele asegura prienxe padraun internasionál liliu protesaun (safety) hodi haree se ró ne’e mout iha ekipamentu ne’ebé salva pasajeiru no traballadór iha laran kala’e nomós sira seluk. (*)