“Reseita husi pasa revista iha fulan-abríl no maiu ne'e, hamutuk $69 mil, husi fulan-abríl por volta de $37 mil no husi fulan-maiu $32 mil ne'ebé mak ita hatama ba kofre estadu, no osan hirak ne'e mai husi atividade pasa revista ne'ebé PNTL halo loron no kalan”, dehan Komadante PNTL Munisipiu Dili, Superintendente Xefe Henrique da Costa, iha Kaikoli, kinta (23/06).
Alende pasa revista ba motorizada, komandu Dili mós nafatin kontinua halo atividade iha tempu kalan ba prevensaun parte krime nia iha Sidade Dili laran.
“Iha komandu mós ita kontinua nafatin halo ita-nia atividade prevensaun krime nia, kalan kalan ita-nia eskuadra sira, halo patrolla la'o ain, patrolla la'o ho karreta, e tama sai bairo, tanba ne'e ita husu ba ita-nia komunidade sira bainhira ita-nia PNTL sira liu bairo karik, fó informasaun ba sira, kona-ba situasaun bairo ida-idak nia, karik ba ema ruma amesa sira ka ou teroor sira, nune'e ita-nia patrollu sira bele hatene, hodi halo kedas medida ruma”, informa nia.
Nune'e mós parte PNTL husu ba komunidade sira ne'ebé uza transporte atu viajen, nafatin haree uluk dikumentu transporte no asesoria hafoin bele sai.
“Ita mós husu kedas ba motorista sira la'o karik, lori ho dokumentu sira karreta nia ka motorizada nia sira, e labele haluha mós antes atu sai ne'e haree mós kondisaun transporte, balun la uza espellu, balun la uza sapa matríkula, dalaruma laiha karta kondusaun, chek foin sai, nune'e labele ita-nia PNTL sira kaer ona mak foin hakfodak”, hatete nia.
Entretantu PNTL halo prensaun ba motorizada sira iha semana kotuk hamutuk 84 motorizada ne’ebé balun mai ona foti no balun seidauk foti. (*)