Alfandega Prende Karreta Klásiku 

Karreta klasiku ne'e pbe prende husi alfandega iha ro Succesu nia laran, iha portu Dili Karreta klasiku ne'e pbe prende husi alfandega iha ro Succesu nia laran, iha portu Dili Foto tempotimor.com
Tempotimor (Dili) – Servisu Alfandega konsege halo aprensaun temporaria ba karreta klásiku ho marka Mini Cooper, produsaun tinan 1975 iha ró-ahi SUCCESS laran. 
 
Parte Alfandega deskonfia, ema balun oras ne’e, uza fali Oekusi nu’udar fatin tranzaksaun sasán illegal, hodi hatama ba Kefamenanu, Atambua no Kupang. 
 
Prosesu aprensaun temporariu ba karreta klásiku ne’e, dirije hosi Koordenador Operasaun Konjunta Alfandega, Dionisio da Cruz Pereira akompaña hosi membru Polísia Nasionál Servisu Investigasaun Kriminál  (PNSIK) iha ró-ahi SUCCESS, Tersa (17/12/19) meudia. 
 
Kondutór ne’ebé lori karreta ne’e tama ba ró-ahi SUCCES hateten, nia patraun husi ofisina ida iha Dili laran, mak haruka nia hodi lori karreta tama iha ró-ahi laran.
 
“Ha’u lahatene buat ida. Patraun mak haruka ha’u mai lori de’it karreta ne’e, hatama iha ró-ahi  laran,” esplika kondutór ne’e ba parte Alfandega iha ró-ahi SUCCESS laran. 
 
Informasaun ne'ebé tempotimor.com hetan hatete, tuir resivu pagamentu ba ró-ahi nian hakerek naran Abitu. Bainhira to'o iha portu Mahata-Oekusi, karreta ne’e sei simu hosi Pak Ricky, ne’ebé hela iha Oekusi. Laiha ema ida mak akompaña karreta ne'e to’o Oekusi. 
 
Karreta ne'e, tula de'it iha ro’o no fó hela xave ba funsionáriu ró-ahi  ne’e nian. Bainhira to’o portu Mahata-Oekusi, mak Pak Ricky foti direita iha ró-ahi laran. 
 
Maibé lakonsege tanba parte Alfandega prende tiha ona kareta ne’e no para hela iha edifisiu Alfandega nian hodi submete ba prosesu investigasaun.    
 
Koordenadór Operasaun Konjunta Alfandega, Dionisio da Cruz Pereira konsidera, lori sasan hosi Dili ba Oekusi dalaruma nu’udar modus ruma ema uza. Tanba, kazu balun akontese ona, hanesan motor Harley Davidson ho karreta klásiku lubuk ida mak dehan lori ba Oekusi, maibé ikus mai sira halo tranzaksaun iha ne'ebá no karreta hirak ne’e ba mosu fali iha Kefa, Atambua no Kupang. 
 
“Tanba ne’e, bainhira ita haree karreta tipe sira hanessan ohin ne’e, ita hakarak hatene karreta nia tipe ne’e mai hosi ne’ebé depois nia ba duni Oekusi ka la’e, ka nia uza Oekusi hanesan fatin tranzitu de’it, hodi halo kontinuasaun ba fatin seluk. Agora, ita lakohi atu ita-nia nasaun sai hanesan fatin tranzitu ba merkadoria ilegál,” esplika Dionisio.  
 
Dionisio dehan, ninia parte hamutuk ho PNSIK halo kedas aprensaun temporaria ba karreta refere, hodi buka no halo investigasaun ba karreta na'in, para bele hatene motivu lori karreta klásiku ne’e ba Oekusi ka atu ba fatin seluk. 
 
Dokumentu ne’ebé parte Alfandega presiza husi karreta na'in, mak dokumentu importasaun. Tanba, Timor-Leste seidauk produz karreta.
Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.