"Moris iha vida kooperativas ne'e konsidera edukasaun mak sai ran ba kooperativas, tamba kooperativa hahú ho edukasaun, dezenvolve ho edukasaun, kontrola ho edukasaun, no depedénsia totál ba edukasaun", dehan Sekretáriu Estadu Kooperativa, Elizário Ferreira, iha ámbitu enserramentu formasaun bázika kooperativa ba Movimentu Uniaun Agrikultura Covalima (UNARCO), iha Edifísiu Administrasaun Postu-Administrativu Suai Villa, Munisípiu Covalima, kinta (28/10).
SEKooP mos apresia no husu ba grupu hirak ne'ebé mak hamahan-aan iha UNARCO, atu nakfilak-aan sai kooperativas, atu nune'e bele iha sustentabilidade.
"Agradese ba organizasaun UNARCO, ne'ebé mak iha inisiativa hodi halibur grupu to'os nain sira, ha'u espera katak ita boot sira sei harii kooperativa ida ho sustentabilidade, katak sustentabilidade iha finanseira no sustentabilidade iha ekonómiku, hodi dezenvolve-aan di'ak liu tan. Grupu agrikultura sira ne'e tenke nakfilak-aan sai kooperativa, hodi nunee bele moris tuir konstituisaun RDTL no regulamentu sira", tenik nia
Elizário Ferreira akresenta, atu kooperativa ne'e, sai forte tenke unidu hodi enfrenta dezafiu oi-oin. Nune'e bainhira atu sai kooperativa, ema hotu-hotu tenke iha inisiativa rasik no governu labele obriga
Iha fatin hanesan, Prezidente UNARCO, João Gusmão husu ba partisipante sira, atu aproveita didi'ak formasaun ne'e, hodi nune'e bele aplika fali iha baze.
Nune'e mos, formandu Marcelino de Jesus rekomenda ba Sekretaria Estadu Kooperativas, atu kontinua fó formasaun ida ne'e, iha futuru. No husu ba formadór SEKoop nian, atu nafatin akompaña sira, bainhira sira estabelese kooperativas primária.
Entretantu, formandu ne'ebé tuir formasaun ne'e, mai hosi grupu agrikultór sira ne'ebé durante ne'e hamahan-aan, iha Movimentu UNARCO, kompostu hosi Postu-Administrativu hitu (7) hanesan, Postu-Administrativu Suai Vila, Zumalai, Tilomar, Fohorem, Fatumea no Fatululik
Formasaun ne'e hala'o durante loron haat, hahú hosi domingu to'o kinta (25-28) fulan outubru tinan ne'e.
Enkuantu Movimentu UNARCO harii iha tinan 2019, hanesan ponte ida hodi buka grupu to'os na'in sira, iha Munisípiu Covalima, oinsá bele asesu ba formasaun, kapasitasaun inklui fasilita produtór sira, lori produtu to'o merkadoria. Durante ezisténsia UNARCO iha Munisípiu Covalima, konsege halibur ona ema hamutuk 1050.
Marka prezensa iha seremónia enserramentu ne'e, hanesan Administradór Postu-Administrativu Suai Villa, Laurentino de Jesus no formadór sira.