Tuir Avelino ne'ebe dala balun fo hanoin kona ba Konstituisaun da Republika ne'e dehan, importante mak ezekusaun, tenke diak atu fó duni benefísiu ba povu no nasaun.

"Ha’u mak ukun karik, hasa'e boot liu tan, nusa foti de'it 3 pursentu, nusa la foti barak liu atu liberta povu dala ida, ekonomia la'o ona mak rai fali osan", nia koalia asuntu ne’e hafoin partisipa seminariu nasional Nobel da Paz iha salaun Sao José Katedral, Segunda (14/12).

Nia mós dehan, Orsamentu Jeral Estadu (OJE) boot diak liu, maibe tenke ho planu dezenvolvimentu ida razoavel.

"Ba ha’u orsamentu boot diak liu, mas tenke planu dezemvolvimentu, programa politiku ekonomi tenke iha nune’e justifika investimentu orsamentu atu hadi'a povu nia moris", nia tenik.

Tuir nia, Orsamentu Jeral Estadu (OJE) foti de'it 3 pursentu, taka ba taka mai ne'e sei la liberta povu.

"Foti de'it 3 pursentu taka ba taka mai hanesan de'it, maibé depende ba partidu sira ne'ebé fó konfirmasaun, ha’u nia partidu defende foti barak par investe ba dezenvolvimentu, ekonomia partisipativa dezenvolve buat hotu", nia argumenta. (*)