Sekretáriu Estadu Kooperativa (SEKoop), Elizário Ferreira informa, iha distribuisaun aihan sesta bázika iha programa ba rekoperasaun ekonómika, husi parte SEKoop responsabiliza ba munisípiu hitu hanesan Suai, Ainaro, Same, Aileu, Manatutu, Likísa ho Lospalos.
Husi munisípiu hitu ne'e, nia dehan, kompostu husi postu administrativu 33, suku 181, aldeia 912, ho nia totál populasaun hamutuk 432.529.
"To'o meiudia ida ne'e, relatóriu ne'ebé mak ha'u foin simu, totál benefisiáriu ne'e distribui ona 102.828, ne'e maka simu ona. Signifika persentájen ne'e maka ha'u seidauk konta ba ida ne'e hira, maibé signifika katak sei hela rihun 300 maka seidauk benefisia, maibé servisu simultaneamente la'o hela iha munisípiu sira", SEKoop Elizário Ferreira hateten ba jornalísta sira iha nia kna'ar fatin Akait Díli, Tersa (15/12).
Nia dehan, daudaun ne'e ekipa distribuisaun akompaña hela prosesu distribuisaun aihan sesta bázika ba komunidade iha kada suku, no sei kontinua nafatin ba to’o populasaun tomak ne'ebé sai responsabilidade SEKoop nian.(*)
