“Memorandum ne'e assina ho ninia objetivu atu dudu dezenvolvimentu kooperativa nian. Agora, área saida mak atubele hala'o ne'e, primeiru mak kooperativa kréditu, tanba World Vision dezenvolve ona saving group ne'e”, informa Sekretáriu Estadu Kooperativa (SEKoop), Elizário Ferreira iha Akait, sesta (28/05).
Tanba iha 107 ne'ebé mak bele nakfilak ba kooperativa bazeia ba kalendáriu no oráriu siraprepara atu fasilita formasaun hodi rejísta sira, no nakfilak sira ba kooperativa.
Husi kooperasaun ne’e, parte SEKoop sei fó atendimentu liuhusi formasaun, edukasaun ho informasaun nian ba membru sira ne'ebé organiza-an iha kooperativa bele fila ba natar atu halo toos.
"Sira atu hakiak animal nomós ba atividade produsaun hothotu ne'ebé mak bazeia ba área ida-idak nian iha territóriu, liliu distritu 4 ne'ebé mak parte Worl Vision hola parte ba mak hanesan, Ainaru, Baukau, Covalima no Aileu”, afirma nia.
Entretantu, Diretóra World Vision iha TL, Miquela Shulla, sente kontente tanba bele halo kooperasaun ho governu TL, liuhusi SEKoop, tanba ne’e ba sustentábilidade no bém-estár komunidade nian.
"Worl Vision Timor-Leste apresia ba sekretáriu estadu kooperativa nia kontribuisaun hodi haforsa kapasidade hodi rai no empresta osan ne'e, atu sira bele kontinua atividade iha futuru no independente, kontinua fornese kréditu ba membru sira hodi hasa'e produsaun super alimentár”, dehan nia.
World Vision TL ho SEKoop mós rekoñese nesesidade ho importánsia atu koopera iha setór ekonómia, hodi haforsa kooperasaun ba grupu agrikultór sira ne'ebé eziste, inklui fó apoiu nu'udár oportunidade ba hasa'e kapasidade husi Uniaun Kréditu.
“Ha'u kontente tebtebes bele asina akordu ne'e no dezeju koolaborasaun forte iha futuru", afirma nia.
Grupu hamutuk 107 ne'ebé parte World Vision forma ona iha munisípiu Ainaru, Kovalima, Aileu ho Baukau, atinje ona sira kapitál finanseira hamutuk rihun US$732,739. (*)