Formasaun ida ne'e nia alvu foka liuba dirijente no membru sira Conselho dos Combatentes Libertasaun Nacional (CCLN), Munisípiu Likisá, hodi hasa'e kuñesimentu iha asuntu kooperativa liliu kréditu no produsaun ninian.
“Iha formasaun ne'e, ha'u sei ko’alia kona-ba matéria ida kona-ba dezenvolvimentu integradu baze iha kooperativa. Matéria ne'e foti husi módulu ida iha planu estratéjiku dezenvolvimentu kooperativa nian, liliu iha relasaun ho formasaun sira ba kooperativa produsaun nian. Tanba ida ne'e mak fó importánsia atu ha'u rasik fasilita formasaun matéria ida ne'e nian”, dehan, Elizário Ferreira, iha sede CCLN, Munisípiu Likisá, segunda (12/07).
Tanba munisípiu Likisá, nu'udár sidade ida hela iha mota-laran, ho populasaun sira hela duni iha sidade mota-laran, presiza halo servisu ida oinsá asegura atu labele sai sidade rai-hanek nian.
“Ne'e, veteranu sira tenke halo servisu ida ne'e. Servisu ne'e mak ida ne'ebé?. Foho leten sira labele tesi-ai bebeik, maibé tenke kee barrajen ba família”, dehan Elizario.
Iha fatin hanesan, Prezidente Kooperativa CCLN iha Munisípiu Likisá, José Pereira de Jesus esplika, kooperativa refere sira hari’i atu kontribui dezenvolvimentu ekonómia Timor-Leste.
“Maibé haforsa ita-nian kooperativa ida ne'e mak presiza firmasaun no kapasitasaun atu haforsa no hakbi'it oinsá mak atu jere kooperativa ne'e”, dehan nia.
Maibé kapasitasaun ba kooperativa sira presiza duni, tanba iha kestaun rekursu, teknolójia no finasiamentu importante.
"Ha'u hanoin buat tolu ne'e mak importante, presiza iha rekursu adejuadu atu jere kooperativa ne'e, presiza fó firmasaun hodi haklean membru sira-nian kuñesimentu oinsá atu jere kooperativa ne'e liuhusi teknolójia no oinsá atu buka finansiamentu atunhaforsa kooperativa ne'e ninian suatentavél”, afirma nia.
Entretantu Prezidente CCLN, Vicente da Conceiçăo ‘Railoos’, agradese ba SEkoop bele to’o iha sira-nia fatin hodi fasilita formasaun ba veteranu sira ne'ebé hanesan mós membru ba kooperativa.
“Agradese ua'in tanba dezlokasaun nai sekretáriu estadu nian, ba abertura ida ne'e, ami hothotu hein e ohin to'o duni loron ida ne'ebé komprometidu katak, fó esperansa ba membru kooperativa tomak ne'ebé rejistadu ona, tanba ami hein hela prosesu ne'e atubele avansa ho atividade sira seluk ne'ebé planeadu tiha ona. Ne'e ami agradese ba ita-boot ninia prezensa iha fatin ida ne'e”, hatetenia.
Totál membru ne'ebé rejístadu iha CCLN atu tuir formasaun hamutuk na'in-95, maibe na'in-30 mak tuir uluk formasaun iha faze dahuluk, enkuantu totál membru Konsellu Kombatente iha munisípiu Likisá, hamutuk rihu-15-resin. (*)
