"Agora sai husi Dili ba Kuala Lumpur, kuaje 142, maioria ita nia timoroan sira ne'ebé mak atu ba buka servisu iha rai liur, Timoroan pur-volta 85 ida hanesan ne'e, kuaje sira ba iha Inglaterra, ba iha Irlandia, ba Iha Porugal, balu ba iha Koreia”, informa Diretór Citilink iha Timor-Leste, Fernando da Silva, iha Aeroportu Internasional Nicolau Lobato, tersa (20/07).

Traballadór na'in-85 ne'e, inklui mós diplomata balu ne'ebé sira-nia misaun remata ona iha Timor hodi fila ba sira-nia rai, ho aviaun Citilink, maizoumenus tuku 14:45 oras meiudia ne'e, husi Aeroportu Internasional Nicolao Lobato, Komoro, Dili.

"Nune'e mós diplomata sira ne'ebé maka sira-nia misaun hotu ona, sira filafali ba sira-nia rai”, hatete nia.

Enkuantu, iha loron tersa (20/07), maizoumenus tuku 12:37 ne'e, Citilink hatun pasajeiru hamutuk na’in-78, kompostu husi delegasaun governu no estadu TL nian balu, diplomata sira husi Estadus Unidus Amérika (EUA) nian, inklui mate-isin hamutuk na'in-tolu.

Mate-isin nain tolu ne'e, ida labarik idade 12 anus, husi Munisipiu Vikeke, nia ba halo tratamentu kuaje tinan tolu resin iha Pakistan, mais depois nia Inan aman ho doutor sira la konsege salva nia vida, nune'e nia transporta husi Pakistan mai Kuala Lumpur, depois mai Dili.

"Segundu, ita-nia maluk feto timoroan ida, ema Suai Zumalai, nia pasiénte husi Ministériu Saúde ne'ebé mak ita-nia governu haruka ba halo tratamentu iha Jakarta, mais depois mós la konsege e nia mós lakon nia vida. Entaun, transporta husi Jakarta ba Medan, Kuala Lumpur foin, to'o Dili. Ida ikus liu, mak maluk timoroan, oan mane ida ne'ebé mak nia oho-an iha Koreia Súl, ne'ebé transporta mós mai Dili", afirma nia. (*)