“Dom Bosco fó ona asisténsia ba vítima sira mak hanesan fatin mak sira utiliza ona hodi hela. Vítima sira mai por volta tuku 8 besik tuku 9. Entaun ami fó fatin ba sira hodi hela tanba buat ne'ebé mak ami fó ne'e mak fatin no buat ne'ebé ami fó bele tulun sira ida ne'e mak ami halo”, hatete Diretór Centru Formasaun Profesionál Dom Bosco, Adriano Maria de Jesus, iha salaun Dom Bosco Komoro, tersa (22/02).
Maibé Sentru mós prepara hahán ba vítima sira no sei prepara mós fatin ba sira dadaun ne'e halo hela instalasaun ba eletritrisidade ba sira atu utiliza.
Vitima sira ne'e Sekretáriu Estadu Protesaun Sivíl mak evakua sira mai, apoiu mós hahán no materiál sira hanesan biti no kaputi, hanesan asisténsia ida husi Governu ba vítima sira.
Enkuantu provozoriamentu vítima ne'ebé rejista ona iha lista Dom Bosco hamutuk uma-kain 59 no família kuaze 200 resin, maibé atu konta totál difísil tanba família balun iha oan barak no família balun rejistu de’it no ba hela fali ho família sira.
Dom Bosco nafatin fasilita fatin ba vítima sira ne'ebé seidauk iha fatin, maske seidauk hetan vizita husi autoridade lokál sira, maibé kolabora ona ho parte Saúde atu fó asistensia médika ba vítima sira hahú hodi kalan to'o agora.
Reprezentante Vítima, Bernardino Borges hatete, akontesementu derepente de’it sira lahatene tanba bee sa’e neneik depois mak foin sobu uma sira no iha balun bee tama laran.
“Ha’u-nia uma bee sobu hotu no sasán iha laran bee lalin hotu. Enkuantu sasán sira ne'e mak hanesan materiál food no non food ninian, ami la konsege salva sasán sira hotu”, inform nia.
Husi akontese ne'e vítima balun hetan kanek iha parte ain tanba koko atu salva sasán maibe la konsege salva.
Antes ne'e parte Autoridade Lokál fó ona orientasaun ba vítima sira atu muda ses husi fatin ne'e tanba risku ona maibé sira lakohi muda husi fatin refere. (*)