“Ba dahuluk FM hakarak agradese ba PN, tanba aprova globál ona ba Lei Investigasaun kriminál nian, maibé husu atu nafatin aprova to’o finál, tanba ne’e FM desde inisiu sempre ko’alia bebeik katak, aleinde kria instituisaun ne’ebé ho karater investigasaun, presiza mós lei investigasaun kriminál atu regula institusaun ne’ebé mak ho karater investigasaun di’ak”, dehan Peskizadoór Prinsipál Fundasaun Mahein, Abel Amaral, iha Bairo Sentrál, kinta (16/06).

Tanba lei refere foin aprova iha finál golbál, hein aprova finál husi Konsellu Ministru hafoin sei fó sai iha jornál da repúblika, nune’e idai-dak bele hala’o nia funsaun ho di’ak.

Fundasaun Mahein nafatin agradese, tanba ida ne’e inisiu susesu ne’ebé mak di’ak, atu nune’e parte Polísia servisu Investigasaun Kriminál (PSIK), Polísia Nasionál Sientifiku Investigasaun Kriminál (PNSIK) ho Komisaun Anti Korrupsaun (KAK) hahú hala’o sira-nia kna’ar tuir ida-idak nia kompeténsia.

Tanba, durante ne’e la’ós Fundasaun Mahein mak preokupa, maibé kuaze públiku tomak preokupa, banhira mosu kazu ida de’it, maibé parte husi orgaun investigasaun ba kazu ida ne’ebé hanesan de’it.

“Ita lakohi fó sala ba instituisaun kriminál, tantu PNTL, PSIK, PNSIK no KAK tanba sira hetan kompeténsia husi Estadu, maibé kompeténsia durante ne’e mak la klaru”, afirma nia.

Maske nune’e, ho lei ida-ne’e, Fundasun Mahein ho públiku fiar katak iha futuru orgaun investigasaun kriminál sira sei halo sira-nian funsaun ho di’ak.

Tanba ne’e, Fundasun Mahein husu ba Governu atubele sosializa lei ida-ne’e ba instituisaun ka orgaun investigasaun kriminál, kona-ba ida-idak nian papel ne’ebé mak istipula iha lei ida-ne’e.

Nune’e orgaun investigasaun sira hala’o de’it kna’ar ba buat ne’ebé hakerek iha lei investigasaun kriminál ne’ebé atual ona iha parlamentu Nasionál aprova.

Kona-ba servisu PSIK ho PNSIK nia papel tuir dekretu lei númeru 15/2014 ne’e, atu fó sai buat balun de’it, ba PSIK rasik atu halo liliu kazu tráfiku umanu, droga, brakamentu kapitál nomós ba kazu klasifikasi dokumentu ka klafisikasaun osan, nomós kompetesia lubuk ida.

Ba Polísa Investigasaun Kriminal ne’e, nia servisu bainbain hanesan ema baku malu ka krime konflitu entre joven ho joven, sira bele halo ida-ne’e.

“Maibé ho aprovasaun lei investigasaun kriminál ne’e, ha’u hanoin katak ajuda tebes ba orgaun institisaun tolu ne’e bele hala’o nia kna’ar ho diak”, afirma nia. (*)