"KM aprova projetu rezolusaun governu ne’ebé aprezenta husi Ministru Justisa, Manuel Cárcceres da Costa, kona-ba nomeasaun ba Tiago Amaral Sarmento nu'udár vogál efetivu ba Konsellu Superiór Majistratura Judisiál," Ministru Fidelis Manuel Leite Magalhães hateten ba jornalista sira iha Palásiu Governu, Kuarta (17/06).

Fidelis dehan, Konsellu Superiór Majistratura Judisiál nia servisu mak halo kontrolu ba atividade majistradu judisiál nian, jere no hatuur dixiplina atividade sira majistradu judisiál nian, nomós nomeia, koloka, transfere no promove juiz sira iha Timor-Leste.

Iha fatin hanesan Ministru Justisa (MJ) Manuel Cárçeres da Costa hateten, KM nomeia fali Tiago Amaral Sarmento, tanba atu prienxe fali matebian Cirilio nia fatin ne'ebé mamuk hela, nune’e, Konsellu Superiór ninia komponente kompleitu.

Entretantu, Tiago Amaral Sarmento nia mandatu ba KSMJ durante tinan haat, nune'e, juiz prezidente husi Supremu Tribunál Justisa (STJ) maka prezide Konsellu Superiór Majistratura Judisiál ne'ebé kompostu husi vogál na’in haat no ida governu maka nomeia.