Tempotimor (Dili)- Fórum Organizasaun Naun Governamentál Timor-Leste (FONGTIL) husu ba Komisaun Anti Korrupsaun (KAK) atu kaptura imediata Ministru Transportes no Telekomunikasaun (MTK), José Agostinho da Silva, tanba deskonfia aluga Ró Tranship II Gresik ne'ebé kondisaun la seguru hodi lori risku ba sidadaun Timor-Leste.
“Husu ba KAK atu halo kapturasaun imediata ba Ministru Transporte no Komunikasaun ho nia diretór sira tanba konsidera ida ne'e hanesan fragante de lito, tuir kódigu prosesu penal, artigu 219”, deklara Diretór Ezekutivu FONGTIL, Daniel Santos do Cramo, liuhusi konferénsia imprénsa iha Kaikoli, segunda (14/06).
Tanba ne’e, konsidera diretór sira MTK utiliza oportunidade hodi habokur-an iha situasaun difísil ne'ebé povu sofre maka'as husi impaktu globál Covid-19.
Tuir informasaun ne'ebé FONGTIL asesu kona-ba aluga Ró transhio II ne'e, mina kada viajen, gastus to’o litru milliaun US$ 31 no bele liu ida ne'e.
Aleinde ne'e, rendimentu husi kada viajen ba Ataúro ka ba Oekussi, nia rendimentu hetan to'o de'it rihun US$5 to'o 6.
“Depois prosesu aluga ró ne'e lada fulan US$220 mill, kada fulan. Entaun, kompara rendimentu ho osan ne'ebé ita hasai ba aluga no mina, la balansu. Tanba ne'e mak ami konsidera ida ne'e, prejuizu ba estadu, estadu lakon, entaun kategória ida ne'e kríme”, dehan Daniel.
Nune’e mós kondisaun ró ne'e rasik la seguru, hodi halo viajen hanesan públiku akompaña ona katak, viajen husi Dili ba Postu Ataúro, lori tempu oras haat, kompara ho Ró Succes no Nakroma, oras ida ho balu.
“Rekomendasaun sira bazeia ba lakon ka prejuizu sira ne'ebé analiza husi dadus ne'ebé ita asesu, mak primeiru ita husu ba Primeiru Ministru, atu kansela aluga ró ne'e”, afirma nia.
Hoi da ne’e, husu ba KAK atu hasai despaixu hodi kansela Ró Tranship II nia operasaun tanba sei prejudika seguransa ba moris populasaun ne'ebé uza ró ne'e.
Bainhira www.tempotimor.com, tenta konfirma ho Ministru Transporte no Telekomunikasaun (MTK), José Agostinho da Silva, iha nia servisu fatin, maibé rezeita la fó komentáriu. (*)
