Iha primeiru interrogatóriu, Arguidu na'in-5 ne'e transporta husi ofisiál Servisu Investigasaun Kriminal (SIK) na'in-rua ho karreta privadu, no to'o iha TDD, maizumenus tuku 10:32, oras dadeersan.

Tuir kronolójia, iha loron tersa (31/08), maizumenus tuku 02:19 madrugada, liuhusi operasaun, Polísia Nasionál Timor-Leste (PNTL) husi Unidade Polísia Marítima (UPM) kaptura arguidu na'in-lima iha área Cristo Rei, bainhira halo hela transasaun tabaku ilegál ho ró ahi, husi Atapupu-Indonézia, mai Dili Timor-Leste.

Evidénsia sira ne'ebé UPM halo ona aprensaun mak hanesan, Tabaku lulun (joker), hamutuk kaixa 40, Ró ahi oan ida, motor beat metan ida, ho Xapa matrikula 0.3770, kareta rua, Carry mean ida, no Truck metan ida.

"Iha fulan-Jullu sira hatun sigaru dala-4, mais ita la hetan. Iha Agostu, sira hatama ona to'o dala-3 mak ita kaptura. Fulan-jullu ho agostu, sira hatun dala 8 ona, sira uza ró husi Atapupu, mai transasaun sasan iha Cristo Rei. Kaer sira iha dadeersan tuku 02:19 minutu, no ita prende Sigaru (joker) iha 40 kaixas", informa Komandante UPM, Superintendente Basilio de Jesus, iha kna’ar fatin, Lesidere, tersa (31/08).

Arguidu na'in-lima ne'e hanesan, Ricardo da Costa (21), husi Kovalima Fatuliulik, José Martins, (22), Bobonaru-Marobo, Rosalino Gonçalves Maia (23), husi Bobonaru-Hauba, Alfredo de Jesus dos Santos, nu'udár na'in ba tabaku (joker) no Caitanus Maubutus (23), husi Atapupu-Indonézia, ne'ebé durante sempre hala'o transasaun ilegál.

Iha prosesu primeira interigatóriu ne'e, prezide husi Juis, Ivan Suritai, Ministériu Públiku (MP), reprezenta husi Aderito Tilman, no Defensor Públiku (DF), reprezenta husi Rui Guterres, Advogadu Privadu, Marito da Silva.

Krime ne'ebé arguidu sira komete mak, kontra bandu, ne'ebé previstu iha artigu 316, husi Kódigu Prosesu Penal Timor-Leste nian. (*)