Diretór Ezekutivu FONGTIL, Daniel Santos do Carmo hatete, sira hakarak keixa ekipa delegasaun na'in-120 ne’ebé lidera husi membru Governu na'in-7 tanba deskonfia sira hamosu prejuizu ba osan Estadu.
"Keixa ne'ebé ita aprezenta ba KAK ne'e, kona-ba ekipa ne'ebé lidera husi Ministru Na'in-7 no vise Ministru, ho delegasaun ne'ebé sentu e vinte, (120) pesoál, ba partisipa iha expo-Dubai ne'e. Tanba sá ita atu keixa, tanba deskonfian iha prezuiju ba eEstadu, ka halo Estadu lakon”, dehan nia ba www.tempotimor.com iha kna’ar fatin Kaikoli, kuarta (20/10).
Pozisaun FONGTIL kestiona asuntu ida ne'e, tanba delegasaun sira ne'ebé ba expo ne'e kuaze ema-120, inklui membru Governu na'in-7. Ida ne'e sei Kustu ba viajen ne'e sei gasta osan boot.
Tanba billete viajen Ba-Mai (BM) Dubai-Dili, kada ema ida mak hetan rihun US$1, siknifika ema 120 ne'e sei gasta osan totál rihun US$120, inklui seidauk sura ho perdiem.
Ho ida ne'e presiza hala'o investigasaun, kona-ba osan viajen ba ema-120 ne'e, totál ne'e mai husi osan millaun US$2 ne'ebé aloka ba expo-Dubai ne'e ka maihusi Ministériu ida-idak nia osan.
Problema ida tán mak polítika Governu daualu ne'ebé halo orsamentu kada programa, siknifika halo programa ida osan sai ne'e tenke iha rezultadu. Maibé FONGTIL lahatene rezultadu imediata kurtu prazu husi expo-Dubai ne'e saida. Tanba ida ne'e sei fó prejuizu ba Estadu.
Iha ne'e situasaun ne'e, FONGTIL haree katak, osan billete ba ema-120, mak aloka rihun US$20 ba kada uma-ka'in karik Governu bele rezolve uma-ka'in purvolta ualu ne'ebé agora dadauk toba hela iha lona okos.
Nune'e FONGTIL konsidera governante sira gasta osan ho intensaun tanba raut ema to'o 120 hodi ba partisipa de'it programa expo-Dubai nian.
"Lori ema barak, e ema sira ne'e ba ho jop saida, e ba atu halo saida. Entaun pela primeira ves delegasaun ida nadodon ba ema-nia rain, iha ita-nia istória, entaun ne'e ami konsidera prezuiju ba estadu ne'e krime”, afirma nia. (*)