"Karik ami fiar katak dadus ne'ebé enkoraja tebes ne'ebé fó sai loroloron husi autoridade responsável sira, kazu ativu ne'e menus husi 10, laiha kazu sériu kona-ba ospitalizasaun, laiha ema ida mak mate durante semana balun nia laran. Tanba ne'e, ha'u sei halo rekursu ba eis-Ministru Estadu Agio Pereira ba Prezidente Repúblika atu hapara Estadu emerjénsia”, dehan Horta liuhusi pájina ofisiál ne'ebé www.tempotimor.com asesu, sesta (19/11).
Kestaun Estadu Emerjénsia la presiza renova tanba Parlamentu Nasional foin lalais aprova ona lei ida ne'ebé fó poder ba Governu hodi kontinua prosesu vasinasaun no aplika medidas restritiva balun hodi kombate pandemia ne’e.
"Difísil atu komprende katak númeru foun sira husi infetadus ho Covid iha ita-nia nasaun kontinua renova filafali no nunka iha fim, deklarasaun Estadu Emerjénsia, ne'ebé mak la serve ona ba interese nasaun nian”, esplika nia.
Tanba ne'e Timor-Leste tenke filafali ona ba normalidade. No tenke relansa fali ekonomia iha rai laran, ho programa kresimentu ekonómiku ida ne'ebé ambisiozu, nomós ida ne'ebé mak bele kria kampu servisu barak liután no bele aumenta osan ne'ebé disponível ba povu.
Husu ba Prezidente Repúblika atu promulga ho urjénsia lei foun ne’ebé mak aprezenta husi Parlamentu Nasionál, nune'e Estadu Emerjénsia ne'e tau rezerva ba situasaun emerjénsia nasional ne'ebé ho loloos. (*)