Komunidade Suku Makalaku, Domingos Freista, informa, durante observa pesoál saúde hala'o servisu iha Postu Saúde Makalaku failla, tanba dala-ruma komunidade sira moras atu halo tratamentu ba saúde, laiha pesoál saúde ida atu atende.
“Ha'u nia haree iha Postu Saúde Makalaku, durante fulan-ida resin ona pesoál saúde sira latama servisu, ema moras dala ruma hein sira, sira la mosu mai atende, sira abandona hela klínika ne'e, balun isin rua ami telefone sira mós, sira la atende, entaun ami hulan ba estrada boot, mak sira mai tula, la'e ami lori to'o Postu Saúde Kelikai Vila", dehan iha edifísiu Postu Saúde Makalaku, Sabadu (31/12).
Distánsia husi Suku Makalaku ba Postu Kelikai Vila pur-volta 7km, maibé komunidade paseinsia tulun malu hodi hulan ema moras ba atu bele hetan atendementu iha fasilidade saúde seluk.
Husu Ministru Saúde (MS) atu toma atensaun ba pesoál saúde sira nia servisu liuliu iha Suku Makalaku, tanba kada fulan simu osan husi Governu, maibé laiha responsabilidade ba kna'ar hanesan pesoál saúde
"Sira abandona hahú husi 2021 to'o agora, la'os dehan sira la mai liu, sira mai mais dala ruma iha semana ida dala ida, dala ruma fulan ida tomak sira latama servisu, sira mai mós atende ema la to'o oras ida sira fila tiha de'it", nia argumenta
Husu MS atu hili pesoal saúde ne'ebé iha vontade hala'o servisu hodi destaka iha Postu Saúde Makalaku hela permanente, nune'e atende komunidade nia moras no tau matan mós ambiente Postu Saúde nian ne'ebé dadaun du'ut moris hale'u, tanba pesoál saúde ne'ebé hala'o servisu iha Postu Saúde refere abandona de’it.
"Haree ema ne'ebé atende ema di'ak ne'e mak mai fali, sira baruk tén ne'e manan osan saugate de'it, sira la atende ami povu ne'e ho di'ak, sira só hatene manan osan, du'ut sira iha uma sorin-sorin ne'e mós la hamós, iha uma laran ne'e mós la hamós, dala ruma ai-moruk ba Postu Makalaku nian ne'e mós kleur nian ne'e mak tau iha ne'e", nia hatutan
Tuir nia, pesoál saúde ne'ebé hala'o servisu iha Postu saúde Makalaku hamutuk na'in-3 kompostu husi feto-ida mane na'in-2.
Xefe Suku Makalaku, Julío Marquez Belo mós lamenta ho servisu pesoál saúde nian iha Postu saúde Makalaku, tanba hela iha fatin seluk hala'o servisu iha fatin seluk.
"Hanesan Autoridade telefone ba sira, maibé sira dehan udan anin hanesan ne'e, la'o mós la di'ak, ne'e mak sira la mai, tanba dalan mak la di'ak", nia haktuir
Rekomenda ba MS, atu harii hela fatin permanente ba pesoál saúde sira, nune'e labele hela dook husi komunidade, wainhira iha moras ruma emerjénsia presiza pesoál saúde nia tulun.
Enkuantu komunidade ne'ebé hetan moras todan, hulan husi Suku Makalaku ba Sentru Saúde Kelikai Vila inisiu Timor nia ukun aan to'o ohin loron pur-volta ema na'in-4 ona.
Tuir observasaun www.tempotimor.com iha terenu nota katak, kondisaun Postu Saúde Makalaku, ai-tahan maran namkare arbiru iha varanda uma nian, livru asentu iha sala laran tau arbiru, duut sira moris iha edifisiu oin, hahú moris barak ba beibeik.
Alende mós kondisaun estrada ligasaun Suku Makalaku ba Postu Administrativu Kelikai ho km7 dadaun motor karreta labele asesu, tanba kauza husi udan ne'ebé akontese iha semana ne'e. (*)
