Tempotimor (Dili)-Primeiru Ministru (PM), Taur Matan Ruak, deside hasai despaisu hodi orienta Inspensaun Jerál Estadu (IJE) no Organizasun Mundiál Saúde (OMS) atu investiga Hospitál Nasionál Guidu Valadares (HNGV) ba kazu deskonfia vasina AstraZeneca ne'ebe at iha konjeladór.
“Primeiru Ministru halo ona despaixu iha loron 06 agostu, ne’ebé fó orientasaun ba Inspesaun Jerál Estadu no Organizasaun Mundiál Saúde (OMS) atu halo auditóriu no investigasaun kle’an atu hatene tanbasá mak kazu ne’e akontese”, dehan Ministru Prezidénsia Konsellu Ministeru (MPKM), Fidelis Leite Mangalhães, iha Parlamentu Nasionál (PN), tersa (10/08).
Vasina hirak ne'e konsege at iha konjeladór laran tanba deskonfia konjeladór ne'e ho temperatura a’as liu grau 10.
Maibé, IJE no OMS sei halo uluk serbisu investigasaun, hafoin iha rezultadu mak bele informa ba PN no públiku.
Ministra Saúde (MS), Odete Maria Freitas Belo, rekoñese vasina AstraZeneca balun at, tanba inpaktu husi situasaun inundasaun iha fulan hirak liubá.
“Tanba vasina ne’e tau iha Hospitál Nasionál, ne’ebé tékniku informa parte eletrisidade mak ladún estável”, dehan nia.
Ho ida ne'e, parte governu konsulta ona ho Organizasaun Mundiál no Saúde liliu empreza ne’ebé prodúz vasina AstraZeneca, maibé laiha métodu ida atu halo teste vasina di’ak ou la’e, maibé deklara de’it katak bainhira vasina ida iha konjeladór mak at, vasina iha laran sei at hotu. (*)