"Konsellu Ministru aprova lista no kalendáriu ba deslokasaun membru Governu sira-nian ba kampaña Vasinasaun Nasionál ne'ebé mak sei hahú iha loron 27 fulan-setembru to'o loron 8 fulan-outubro", dehan Ministru Fidelis iha Palásiu Govern, sesta (24/09).
Kada Ministru ida-idak filafali ba nia hela fatin iha Munisípiu to'o suku sira hodi halo kampaña Vasinasaun Nasionál ba sidadaun sira atu nune'e komunidade sira simu vasina atinje to'o pursentu hitunolu (70%).
"Ministru sira sei fila ba Munisípiu sira hodi bele komunika ba sira iha ne'ebá importánsia vasina nian atu prevene ita husi moras Covid-19”, dehan nia.
Ministru Justisa (MJ), Manuel da Costa Cárceres hatete, nia sei filafali ba nia Munisípiu hodi halo sosializasaun kampaña Vasinasaun Nasionál.
"Hanesan lorosa'e oan, Manatutuoan, Laklooan sei filafali ba ko'alia ho suku sira tanba ita komunidade importante, nune'e ami sei ba halo kampaña iha ne'ebá”, dehan nia. (*)