"Iha vida kooperativa ezije karáter ida bolu dehan, umilde, onestu no simplisidade. Ne’e katak, hahú ho umildade, dezenvolve ho onestidade, no komtrola ho simplisidade. Ho karáter tolu ne'e bele asegura ita-nia kooperativa ne'e bele la'o ba oin. Sé ita dezenvolve kooperativa ho loko-an, no foti-an, komunikasaun la di’ak, ita-nia kooperativa sei mate. Sei la la'o ba oin", dehan Sekretáriu Estadu Kooperativa (SEKoop), Elizário Ferreira, iha serimónia tomada de pose ba membru kooperativa COMUHABO sira, iha Sede Suku Home, Lospalos, sesta (17/09).
Tanba ne’e, husu ba membru no dirijente kooperativa sira atu organiza bebeik reuniaun iha kada semana, nune'e labele iha deskonfiansa ba malu.
"Entaun, reuniaun ne'e tenke la'o bebeik atu nune’e bele asegura komunikasaun di'ak, hodi labele hamosu deskonfiansa iha kooperativa nia laran, ikus mai fahe malu", hatete nia.
Prezidente kooperativa COMUHABO, Eurico Pereira, orgullu ho prezensa hosi Sekretáriu Estadu Kooperativa, tanba bele hakat to'o ona iha sira-nia suku, maske grupu kooperativa ki'ik ne'e foin estabelese.
"Ha'u hanoin, kooperativa ida ne'e foin mosu ba ita, so úniku mak, ita foin hari'i. Maibé ita hari'i kooperativa ne'e komukl ita iha hakarak hadi’a ita-nia vida. Tanba ita hakarak atu kuda ita-nia moris, liuhusi kooperativa ne'e. Tanba ne'e, ita sira ne'ebé durante ne'e esforsu ona, inklui ona ba kooperativa ida ne'e, ita tenke servisu hamutuk, para lori kooperativa ne'e ba oin", dehan nia.
Kooperativa ne'e hanaran "Ba Oin", la siknifika atu lao mesak, maibé hothotu tenke la'o hamutuk hodi atinje objetivu ne'ebé planeadu ona.
Maibé husu ba SEKoop atu apoia finanseira ba sira hodi bele hari'i mós sira-nia sede nune'e bele halibur sira hala'o atividade kooperativa.
"Tanba ne'e, hanesan kooperativa iha ne'e, hanesan rekomendasaun iha ba sua exelénsia atu ajuda netik ami, atu ajuda netik ami, tanba ami hanesan estrutura foun ne'ebé foin mak hari'i kooperativa", rekomenda nia.
Kooperativa COMUHABO nu'udár kooperativa integradu ne'ebé hala'o atividade kréditu, no tuir planu sei promove mós ho produsaun no Ortikultura ninian.
Kooperativa ne'e hari'i iha loron kuarta (15/09/2021) ne'e, ho membru hamutuk na'in-28, foin akomoda kapitál finanseira hamutuk US$.90. (*)
