Tempotimor (Dili)-Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hatete, dadauk Governu submete ona informasaun kona-ba problema labarik fa’an sasán iha fatin públiku ba Ministériu Solidariedade Sosiál no Inkluzaun (MSSI) no Komisaun Nasional Diretu Labarik (KNDL) atu buka solusaun.
“En-relasaun ho señora deputada Maria ninian, kona-ba labarik sira, loos duni, ha'u hanoin Ministériu Solidariedade ami informa ona, ita mós komisiáriu ne'e rasik ne'ebé mak tutela ba labarik sira”, dehan nia iha plenária Parlamentu Nasionál (PN), tersa (01/03).
Pozisaun Governu kontinua husu atu Ministériu Solidariedade Sosiál no Inkluzaun no Komisaun ba Diretu Labarik atubele tau atensaun di'ak no kontrola tanba sá labarik sira barak kontinua fa’an manu-tolun no dudu karosa hodi fa’an pentolan iha Timor Plaza oin, no Largo Lesidere no inklui iha fatin seluk.
“Informasaun sira ne'e, ami informa ona ba parte kompetente liliu Ministériu Solidariedade ho Komsiária para tau matan ba situasaun ida ne'e”, afirma nia. (*)
