"Uluk ha'u ko'alia bebeik ona, imi (mídia) komplika nafatin ho liafuan ida Pensaun Vitalísia ne'e, iha ita-nia meza leten ne'e laiha lei kona-ba pensaun vitalisia ida, iha mak rejime remuneratóriu ba membru eis titular husi orgaun soberanu sira-nian, ne'e uluk ha’u ko’alia ida ne'e”, esplika Prezidente Komisaun A, Joaquim dos Santos, iha PN, kuarta (23/03).

Tanba proposta ne'ebé Governu aprezenta ba parlamentu ne'e la'ós proposta alterasaun ba lei pensaun vitalisia maibé ne'e alterasaun ba rejime remuneratóriu ba eis titular hodi tranzita filafali ba Rejime seguransa sosiál.

Dadauk Komisaun A seidauk bele kria ajenda tanba proposta husi Governu mai atu halo alterasaun ba kompeténsia ne'e fó fali ba rejime seguransa sosiál, depois atu tranzita diretu ne'e ba fali iha rejime seguransa sosiál, maibé Komisaun haree katak rejieme sei iha konflitu oituan kona-ba valor, tanba ne’e, presiza hein fundamentu husi Governu hanesan porponente.

“To'o agora laiha, ladauk hatama, ne'ebé ajenda ne'e la’e. E depois lei ne'e ita muda ninia ajendamentu ne'e tanba proposta sira mai ne'e urjente-urjente mak barak liu”, dehan nia.

Iha tinan 2019-2020, loloos komisaun A finaliza ona proposta ne'e maibé tanba iha proposta no projetu lei balun ne'ebe urjente entaun lei ne'e hetan pendente to'o agora.

“Mais de kualker forma, lei ne'e ita nafatin hatama iha ajenda iha tinan ida ne'e nia laran, ne'e mós ha’u seidauk iha garantia, hanesan Prezidente Komisaun ne'e, deputadu sira to'o iha konsensu atu aprova lei ne'e”, hatete nia.

Ba lei ne'e, deputadu sira bele to'o iha konsensu ka la konsensu, ida ne'e nu’udar kompozisaun ba meza komisaun A prontu haruka ba Parlamentu Nasionál bainhira iha ona ajenda ne'ebé definitivu.

“Ajenda ona ha’u tenke haruka ba Parlamentu, mais problema ne'e tenke klaru ehh, Lei pensaun Vitalisa ne'e laiha ida, ne'e uluk kedas ema revoga dala-rua ga dala-tolu laiha ida, iha de'it mak Subsídiu Reinzesaun sosiál ne'e ba eis titular mais lei revogadu tiha ona”, esplika nia.

Ho ida ne'e, Komisaun A rejeita Lei Pensaun Vitalisia tanba proposta ne'ebé atu mai hadi’a fali ne'e ho titulu foun maka rejime remuneratóriu ba orgaun titular Estadu.

“Ne'ebé ami sei diskute ida ne'e, hein de'it, deputadu sira mak iha kompeténsia ne'e, mais ajendamentu iha nafatin”, informa nia. (*)