“Kuandu ha'u Prezidente, iha líder ida Grupu Arte Marsiál ida, kondenadu husi tribunál, tanba buat ida ne'ebé nia halo, pois ha’u mak hasai nia, halo indultu ba nia, ha'u la temi naran”, haktuir Horta iha loron dahuluk komísiu kampaña segundu volta iha Oekussi, sábadu (02/04).

Iha momentu ne'ebá, Horta rasik la koiñese líder GAM ne'e, husi partidu ne'ebé, tanba seidauk iha partidu politiku ida, maibé felismente líder GAM ne'e ema Ainaro nian.

Tanba rona situasaun ne'e Horta rasik ba Ainaro iha tinan 2004, buka rezolve probelma ida iha ne'ebá, purtantu líder GAM ne'e nia ba kadeia iha Gleno.

Hafoin mai fali iha tinan 2006 bainhira asume mandatu nu’udar Prezidente Repúblika entaun momentu ne'eba deside halo indultu hodi fó liberdade ba Líder GAM ne'e.

Maske iha ema balun hatete karik Ramos Horta eleitu sei taka Arte Marsiál ne'e laloos, tanba nu’udar Eis Prezidente iha 2007-2012, seidauk taka Arte Marsiál ruma.

Maibé hakarak promete katak, se eleitu mak odamatan iha palásiu sei loke ba ema hotu, liliu Grupu Arte Marsiál, arte rituál, para ko'alia oinsá joven sira ne'ebé hola parte iha grupu hothotu, bele servisu hamutuk ho Estadu, Governu no Polísia Nasionál Timor-Leste (PNTL) hametin liután seguransa no dame iha rai ne'e nia laran.

“Ho imi buka ideia oinsa imi bele sente imi-nia dignidade, imi iha diretu, fururu tanba imi joven halo parte Arte Marsiál, depois kaben, kuandu joven, depois iha oan, tenke preokupa ba oan sira, preokupa osan ba oan sira, e ba fen”, afirma Horta.

Tanba ema moris, la internalmente, ne'e duni labele lakon tempu ho violénsia, ho ódiu, ida ne'e mak prezidente hakarak halo oinsá mak ko'alia atu hetan fatin, hetan dalan, ideia ba joven sira ne'e bele hetan esperansa ho fiar ba futuru. (*)