Tempotimor (Dili)-Ekipa Susesu husi Kandidatu Prezidente Repúblika (PR), Francisco Guterres ‘Lú Olo’, krítika Komisaun Nasionál ba Eleisaun sira (CNE) no autoridade Seguransa liliu Polísia Nasionál Timor-Leste (PNTL) ne’ebé abandona Kandidatu José Ramos Horta ho partidu Congresso Nacional de Reconstrução de Timor (CNRT) viola regra kampaña eleitorál, iha Atsabe, Munisípiu Ermera, kinta (07/04).
"Kandidatu José Ramos Horta no partidu CNRT tau sira-nia an iha regra eleitorál nia leten maibé laiha reasaun husi CNE, nu’udar entidade públika ne’ebé tenke halo supervizaun ba eleisaun prezidensiál ida ne’e tuir regra hatuur husi Estadu”, dehan Reprezentante Legál Kandidatu Francisco Gusterres Lú Olo, Fernandos Dias Gusmão liuhusi komunikadu imprensa ne'ebe www.tempotimor.com asesu, sesta (08/04).
Tanba atetude ne'ebé komete husi Horta ho CNRT iha loron 7 abril 2022, iha Atsabe, Munisípiu Ermera, instituisaun públika sira envolve iha monitorizasaun kampaña la hatudu autoridade nein imparsialidade inklui Polísia Nasionál Timor-Leste (PNTL), nu’udar autoridade públika ne’ebé iha dever tomak atu garante kumprimentu regra Estadu nian.
"Tanba husik de’it kandidatu José Ramos Horta no partidu CNRT viola regra Estadu nian”, afirma nia.
Tanba ne'e, liuhusi karta protestu ba CNE, ne’ebé aprezenta iha loron sesta (08/04), no ekipa susesu kandidatu Francisco Guterres Lú Olo mós hakarak fó-hanoin ba entidade hotu ba utilizasaun regra sira ne'ebe hatuur ona iha lei no dekretu Governu.
Iha lei Númeru 4 /2017, 23 fevereiru, aprova alterasaun dalima ba lei númeru 7/2006, 28 dezembru kona-ba lei eleitorál ba Prezidente Repúblika, kona-ba prinsípiu kampaña eleitorál artigu 28, alínea 2 hatete katak “CNE verifika respeitu ba prinsípiu sira ne’e, aplika husi loron determina data eleisaun, no adota medida sira ne’ebé garante kumprimentu no dezenvolvimentu pasífiku kampaña eleitorál”.
Aleinde ne'e iha mós Dekretu Governu Númeru 3/2022, 10 Janeiru, alterasaun dahuluk ba Dekretu Governu númeru 5/2017, 27 fevereiru, ne’ebé regula a kampaña no propaganda eleitorál.
Tanba ne’e, kona-ba limitasaun tempu ba kampaña eleitorál, tuir artigu 11.º husi dekretu refere katak propaganda eleitorál bele de’it akontese husi tuku 8 dadeer to’o tuku 6 loraik de'it. (*)