“Ita-nia selebrasaun independénsia tinan 20 ne’e, ita-nia na'i-ulun sira no povu hatudu duni katak furak ba ita atu hahú rekoñese grasa no favór hotu ne’ebé ita simu husi Na’i Maromak, molok hakat ba aban loron ne’ebé aas liután. Entaun ba ha’u sente furak tanba iha ita-nia selebrasaun Eukáristia la’ós de’it kuantidade, tanba ema barak, maibé liliu ita-nia membru Governu, Deputadu no Na’i Ulun sira barak ne’ebé mai misa atu reza hamutuk”, dehan nia iha misa agradesimentu ba komemorasaun loron 20 maiu, Igreja Katedrál, kuarta (18/05).

Tanba, ho eventu importante ne'ebé sei mosu mai, ida ne'e sei fahe ba parte tolu, dahuluk mak realiza ho Eukáristia Santu, tuir mai serimónia investidura Prezidente Repúblika iha Tasitolu no ikus liu mak Isár Bandeira iha 20 maiu 2022.

Maibé selebrasaun ida ne'e la’ós reza de’it, no la’ós refleta de’it maibé reza ba Maromak loke ema nia fuan atu timoroan hothotu kompromete nia-an, haka’as-an hola konsiénsia ida katak hakarak Timor ida-ne’ebé di’akliu, no tenke kontribui ba Timor nia di’ak.

Tanba ne'e, Timoroan hotu tenke halo buat ruma, laiha ema ida mak iha ne’e kompete Governu nian de’it no kompete Igreja nian, maibé timoroan hotu hahú husi labarik, joven, inan no aman, família iha papél ida atu kontribui ba konstrusaun país ida-ne’e nian. (*)