“Na'in Prezidente promete katak nia sei ko'alia ho LELI kona-bá ingles e nia sei ko'alia tan ho institutu Camões atu buka dalan oinsá bele fó formasaun ba jornalista sira atu nune'e bele aumenta kapasidade liliu iha lian”, dehan Prezidente Timor Leste Press Uniom (TLPU), Candido Alves, hafoin hasoru malu ho Prezidente Repúblika, Ramos Horta, iha Palásiu Prezidensial, Bairopite, tersa (31/05).

Durante iha audénsia, Prezidente Timor Leste Press Uniom (TLPU), Candido Alves hatete, sira husu apoiu husi Prezidente Repúblika oinsá mak jornalista sira bele hetan mós formasaun hodi hasa'e koiñesimentu ba lian-rua ne'e.

“Formasaun ne'ebé ita husu katak durante ne'e ita hatene katak jornalista hakerek ha'u la dúvida maibé kona-ba lian-inglés ou portugués, ita sente katak ita sei menus husi ne'eba, entaun na'in Prezidente mós sei buka oinsá atubele formasaun ba ita jornalista kona-ba lian-inglés ho lian-portugés”, esplika nia.

Aleinde ne'e, TLPU rekomenda mós ba PR Horta atu tau atensaun ba jornalista sira ne'ebé mak loroloron destaka iha palásiu Prezidensiál, presiza oferese fatin ida ba sira hala'o servisu ho di'ak tanba loron tomak sira hala'o servisu iha Palásiu. (*)