“Boa viajen, servisu di’ak ba imi hotu. Ha’u-nia mensajen mak imi ba iha ne’ebá kumpre lei no kultura Korea Súl nian”, dehan Horta hafoin Partisipa serimónia asina deklarasaun entre SEFOPE ho família traballadór timoroan na’in-111, iha salaun Timor Lodge, Komoro, sesta (15/07).

Ba oportunidade ida ne’ebé iha, tenke aproveita ho didi’ak nomós nafatin disiplina iha servisu hothotu, nomós labele gasta osan arbiru, hodi joga, tenke rai didi’ak osan hadi’a ekonómia família, liliu selu oan sira-nia eskola.

“Imi ne’ebé sei joven, ba ne’ebá, sé bele aproveita estuda online, tanba iha ne’ebá estuda online di’ak loos”, hatete nia.

Tanba deslokasaun husi traballadór timoroan hirak ne’e sai hanesan mós reprezentasaun husi nasaun Timor-Leste nian iha Korea Súl, maibé presiza hatudu komportamentu di’ak iha sosiedade no servisu sira, nune’e ema estranjeiru bele admira no manán konfiansa liután.

Dala-ruma iha ema balun dehan timoroan barak mak agora sai hotu ba servisu iha rai-li’ur ne’e ladi’ak maibé estadu hanoin ida-ne’e normál, ba servisu iha rai-li’ur hanesan Korea Súl.

Tanba fenómenu iha mundu ema millaun ba millaun mós ba rai seluk hala’o servisu ne’ebé hatama osan boot ba ekonómia.

Tanba ne'e, Xefe Estadu fó apoiu nafatin ba Sekretária Estadu Formasaun Profisionál Empregu (SEFOPE) hodi kontinua tau orsamentu oinsá kapasita joven sira iha formasaun tékniku hodi prepara sira ba servisu iha rai-seluk.

Maibé ba joven sira kuandu sai ba li’ur tenke organizadu liuhusi SEFOPE ka ajénsia sira-ne’ebé koopera ho SEFOPE, nune’e ikus labele mosu problema ka difikuldade oioin no oinsá garante seguransa vida. (*)