“Daudaun ne’e ita halo Planu Ordenamentu a nível teritóriu nasionál, Planu diretór ba sidade Dili no munisípiu sira para determina zona ne’ebé populasaun bele hela, zona ne’ebé ba administrasaun, no zona ne’ebé ba komérsiu, turizmu no seluk tan. Depois halo planu mestri ho forma sistemátiku. Ita hakarak tinan 20 ne’e Dili sai hanesan ne’ebé," dehan PM Taur hafoin loke semináriu kona-ba Kuadru Nasionál Planeamentu Integradu Médiu Prazu iha Ministériu Finansas, foin lalais ne'e.

Xefe governu ne'e liu ona tinan ruanulu, maibé Timor-Leste seidauk iha planu ordenamentu teritoriál, nune'e kada governu halo tuir idaidak nia planu.

"Ha’u lembra iha 2002 to'o 2004 sei jenerál, partisipa iha enkontru primeiru governu nian kona-ba Planu Ordenamentu Dili no Baukau, mas depois governu seluk sa’e mai so'e tiha, 20 anos liu tiha ita laiha planu a nível nasionál," Nia afirma.

Bainhira laiha planu ordenamentu no planu diretór ba sidade maka sidade Dili sei la organizadu, ema sei mai hela arbiru de'it, entaun ema hosi li’ur mai haree kapitál Dili dalaruma fó fali kuitadu.

"Ita sai fali sékulu anteriór, Ita ukun aan pior liu fali Indonézia nia tempu no pior liu fali Portugués nia tempu," Taur afirma.

PM ne'e hatutan, atu dezeñu planu ne'e mak Vise Primeiru-Ministru no Ministru Planu Ordenamentu Teritóriu, ne'ebé hahú ona halo Planu Ordenamentu ba nível teritóriu nasionál dezde 2020 no dadaun ne'e iha hela prosesu, atu husik hela hanesan dokumentu estadu hodi governu sira tuir mai bele halo dezenvolvimentu tuir planu ordenamentu ne’ebé estabelese ona.

"Dala ruma ita-nia sidadaun sira krítika maka’as governu hanesan ne’e, governu hanesan ne’ebá, ema dehan, ita ku’u buat ne’ebé ita kuda tiha ona, buat ne’ebé tinan 10 resin ba kotuk ita kuda mak ohin ita ku’u ne’e, ne’ebé buat ne’ebé ita kuda agora só tinan 10 ka 15 mai mak ita ku’u”, Nia dehn.

Eis Prezidente Repúblika ne’e komenta, planu ida ne'e tenke iha, tanba bainhira governu ida laiha planeamentu ida integradu, mak governu ida mai harii, governu seluk mai sobu tuir sira-nia hakarak tanba laiha matadalan ida ne'ebé guia dezenvolvimentu nasionál, hodi fó garantia katak Timor-Leste tinan sanulu ka ruanulu mai atu ba ne’ebé no sai hanesan ne’ebé. Tanba ne’e Planeamentu Integradu ne’e importante hodi evita arbitrariedade ba uzu rekursu povu nian.(*)