Programa inaugurasaun ne’e, hahú ho serimónia kulturál tuir lisan Bubususu nian, lia dadolin no tara tais ba Ministru Francisco inklui akompaña ho atividade tebedai no dansa ka bidu tradisionál no ikus liu loke kuadru, asina plaka nomos hala'o vizita ba kondisaun uma ba sentru informasaun.
Nune'e, Ministru Jerónimo iha ninia diskursu, hatete, kriasaun sentru informasaun ne'ebé governu liuhusi Ministériu Asuntu Parlamentár no Komunikasaun Sosiál harii ne'e, nu’udar sentru ida atu halibur joven sira hodi hala'o relasiona ho dezenvolvimentu komunikasaun ninian no bele promove Suku Bubususu ba públiku.
"Ohin ha'u mai atu inagura sentru informasaun ne'e, hanesan ha'u promete bainhira hala'o diálogu ho ita-bo'ot sira iha ne'e", dehan Ministru Jerónimo, liuhusi ninia diskursu iha serimónia inagurasaun ba sentru informasaun iha Suku Bubususu, kinta (15/12).
Husu ba Joven Bubususu-oan atu uza sentru informasaun ho didi'ak, hodi fó sai informasaun ne'ebé loloos no fahe mós istoria Bubususu nian ba ema hotu hodi bele atrai vizitante sira mai vizita Bubususu.
Aleinde ne’e, apelu mós ba joven no komunidade hotu iha Suku Bubususu atu kuidadu kondisaun ida-ne'e, nune'e ba oin sentru bele la'o ho dignu no seguru.
Xefe Suku Bubususu, Estanislau Borges mós agradese ba MAPKOMS no membru Governu sira, ne'ebé bele hakat besik liu mai hamutuk ho sira, liliu haree direta kondisaun estrada, eletrisidade no edukasaun.
Sorin seluk, Administradór Munisípiu Manufahi, Arantes Isaac Sarmento konsidera programa ne'ebé governu liuhusi MAPKOMS kria, ida-ne'e atu tulun komunidade sira atu sai husi izolamentu.
Tanba ne’e, fiar katak, ida-ne'e sei bele reforsa tán ejizensia sira kona-ba preokupasaun komunidade nian ba governu.
Entretantu sentru informasaun ne'e, nu’udar programa ida ne'ebe hanaran programa governu iha povu nia le'et no atividade maka "naroman ba suku".
Nune'e, pontu prinsipál ne'ebe sai prioridade ba sentru informasaun iha suku bubususu maka, promove suku rurál sira no hakbi'it komunidade sira-nia kapasidade hodi asesu ba informasaun no nforma ba komunidade kona-ba programa Governu nian no rona komunidade sira-nia preokupasaun kona-ba dezenvolvimentu no transmite mós ba ministériu sira ne'ebé relevante.
Hasa'e komunidade sira-nia koñesimentu kona-bá dalan no prosesu halo planu dezenvolvimentu inklui iha nivel suku no prosesu implementasaun planu dezenvolvimentu no dalan ba povu nia partisipasaun no kontrolu. Hasa'e no haluan povu nia partisipasaun ativu iha dezenvolvimentu nia prosesu tomak no goza di'ak dezenvolvimentu nia benefísiu sira. (*)
