"Lori komandu Munisípiu Dili hamutuk ho komandu eskuadra partilla ba ita bo’ot sira katak, primeiru louva alin arte marsiais no arte rituais iha Metinaru hamutuk ho autoridade sira hotu, hahú husi administradór to’o veteranus, inan-aman, tanba ita boot sira-nia kontribuisaun makas tebes bele kria paz estabilidade iha rai Metinaru", Segundu Komandante PNTL Munisípiu Dili, Superintendente João Sancho Pires haktuir iha informasaun ne'ebé www.tempotimor.com asesu iha pájina servísu relasaun públika, sexta (16/12)

Tanba, nia halo komparasaun entre Dili ho Metinaru durante ne’e, kazu entre GAR no GAM akontese iha Dili barak liu, maibé iha Metinaru ida de'it, mak hanesan kazu violensia Domestika.

"Ita halo komparasaun kazu Dili barak iha eskuadra 4 ne’ebé maka sa’e makas, maibé Metinaru fulan kotuk iha kazu ida de’it maka kazu Violénsia doméstika ne’ebé rejistu hela iha Ministériu Públiku no prosesu la’o hela”, nia haktuir.

Nia dehan, membru ne’ebé envolve iha Grupu artemarsiais no rituais ne’e, treinu atu salva-aan, la’os uza hodi kria problema.

“Ohin hakarak hateten, ita boot sira-nia kontribuisaun makas tebes oinsá kria estabilidade iha rai ida-ne’e, ita boot sira treinu para salva ita boot sira nia-aan, tanba ne’e maka ha’u louva ita boot sira", nia louva.

Nune'e, nia sujere ba Autoridade sira iha Postu Metinaru atu kontinua organiza grupu Arte Marsiais no Rituál hodi nafatin sai ezemplar ba GAM ho GAR sira iha Munisípiu sira seluk. (*)