Prezidente Repúblika, Francisco Guterres Lú Olo, liuhusi mensajen bainhira fo posse ba embaixador sira hateten, reprezentante sira tenke sai promotor ba pas no dame iha mundu.

"Embaixadór iha ninia lala’ok mak lalenok Estadu nian ne’ebé nia reprezenta, Ita-nia país hakarak sai promotór ba pás, diálogu no prinsípiu sira ne’ebé lori povu sira atu iha relasaun ba malu ho laran hakmatek no respeitu," dehan Prezidente Repúblika, Francisco Guterres Lú Olo, iha Palásiu Prezidensiál, Bairru-Pité, Tersa (28/1).

Xefe Estadu hatete, liuhusi embaixadór sira mak reprezentante Timor-Leste iha nivel aas. Nune'e, Estadu Timor-Leste hatudu vontade atu haklean relasaun ho membru komunidade internasional, nune'e fó kontribuisaun ba pás hanesan parte husi Umanidade.

Prezidente Repúblika, Francisco Guterres Lú Olo, fo posse ba embaixador hamutuk na'in 9 tuir dekretu ne'ebé fó sai hanesan embaixadora Singapura, Maria Natália Viegas Carrascalão, Embaixadór Kambodia, Ermegildo Lopes, Embaixadora Vatikanu Juvita Rodrigues, Embaixadór Xina, Abrão dos Santos, Embaixadora Portugál, Isabel Amaral, Embaixadora Laos, Maria Renata, Embaixadora Austrália, Inês Maria, Embaixadór Reuni Unido no Irlanda Norte, Gil da Cos Embaixadór Japaun,  Ilidio Ximenes. (*)