"Ami mai hato'o dala ida tan ba Primeiru Ministru atu oinsa mak hahú halo diskusaun ba proposta dekretu lei kona-ba planeamente forsa traballu," dehan Prezidente Komisaun Funsaun Públika, Faustino Gomes, iha Palásiu Governu, Tersa (18/2).
Nia esplika, importante tebes dekretu lei ne'e tanba KFP presiza halo kontrolu ba mákina Estadu ne'ebé kontinua todan ba beibeik.
Faustino hatutan, KFP mós aprezenta alterasaun proposta dekretu lei avaliasaun dezempeñu tanba durante determina de'it ba fatór sia, la inklui funsionáriu halo saída? rezultadu servisu alkansa ona ka lae? Nune'e proposta ne'e sei aposta situasaun sira atu halo avaliasaun dezempeñu iha ona sasukat ne'ebé klaru.
Alende ne'e, KFP mós aprezenta proposta dekretu Governu kona-ba regulamentu sistema kontrolo internu iha funsaun públika.
Dekretu Guvernu ne'e bainhira aprova sei regula funsionamentu internu no servisu hamutuk entre Inspetór Jerál Estadu (IJE) ho inspetór no auditores hotu-hotu.
Perante ne'e, KFP mós aktualiza promosaun funsionáriu ne'ebé 2019 konklui ona ema 1.354 ne'ebé promovidu grau no tinan 2020 KFP halo ona perparativu atu hakat ba promosaun tuir mai nian.
Relasiona ho promosaun funsionáriu, KFP mós aprezenta rezolusaun Governu ida atu determina númeru vaga ba promosaun 2020.
KFP mós autualiza ba Primeiru Ministru, Taur Matan Ruak, kona-ba selesaun pur-méritu ba kargu xefia. To'o ohin loron, husi 1.900 kargu diresaun xefia ne'ebé KFP iha, 25% mak foin halo selesaun pur-méritu no 75% seidauk.
Maski esforsu halo nafatin, maibé evolusaun situasaun polítika atuál la favorese atu halo selesaun pur-méritu. (*)