Semana Ne'e, Koligasaun Foun Hasoru PR Lú Olo

Xefe Casa Sivil, Francisco Vasconcelos Xefe Casa Sivil, Francisco Vasconcelos Foto Midia PR

 

Tempotimor (Dili) - Xefe Casa Civil Prezidensiál Repúblika fó sai katak partidu koligasaun foun ne'ebé lidera husi CNRT hatama ona pedidu atu hasoru malu ho Prezidente Repúblika, iha semana ne'e nia-laran.

"Prezidente hakarak hasoru iha semana ida ne'e laran. Data depois Gabinete Prezidensiál mak fó sai," dehan Xefe Casa Civil Prezidensiál, Francisco Vasconcelos, iha Palásiu Governu, Tersa (3/3).

Nia esplika, Gabinete Prezidensiál simu ona karta husi partidu koligasaun foun ne'e no sei hein reposta data fiksu iha semana ne'e nia-laran.

"Sira haruka karta mais hein Prezidente (Repúblika) responde para sira ba hasoru," hatutan Vasconcelos. 

Antes ne'e, koligasaun foun ne'ebé lideradu husi CNRT kompostu hudi partidu lima seluk hanesan PD, PUDD, Frente-Mudansa no UDT asina ona ata koligasaun foun ne'ebé realiza iha sede CNRT, foin lalais ne'e. 

Iha fulan Fevereiru tinan ne’e, Prezidente CNRT Kay Rala Xanana Gusmão liu husi intervista iha televizaun GMN hatete, CNRT sei la buka Partidu seluk atu forma governu no prefere liu EA. 

“CNRT tama ho Governu ida ne’e, ho ida ne’eba, nia ema sei la toma pose, ita ba halimar fali forma Governu ka lae! Menus CNRT, Partid seluk-seluk mak tenke buka malu, ko’alia ba malu, la’ós ha’u mak atu ba dialogu," dehan Prezidente CNRT .

"Ha’u dehan tiha ona CNRT iha serteza absoluta ho (partidu) see-see de’it, (CNRT) nia ema sei la toma pose. Ah buka (kandidatu) seluk lae, ne’e ami-nia kompetensia, tanba ne’e atu responde ita-boot (entrevistador) ba CNRT, ba de’it ami (CNRT), lae,” nia realsa.

“Ba ami CNRT elisoins antesipada mak dala loos, Justa no demokratika, tanba ita Repúblika Demokrtaika de Timor-Leste,” dehan Prezidente CNRT, Kay Rala Xanana Gusmao. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.