Deklarasaun Deputada Olinda Ba Sekjer Interinu CNRT La'ós Orientasaun Partidu KHUNTO

Deputadu bankada KHUNTO, Luis Roberto haleu husi estrutura Partidu, ko'alia ba midia  iha sede partidu Manleu Ana, Dili (30/4) Deputadu bankada KHUNTO, Luis Roberto haleu husi estrutura Partidu, ko'alia ba midia iha sede partidu Manleu Ana, Dili (30/4) Foto Tempo Timor

Tempotimor (Dili) - Partidu Kmanek Haburas Unidade Nasionál Timor Oan (KHUNTO) la fó autorizasaun ba deputada Olinda Guterres hodi deklara iha Paralmentu Nasionál (PN) temi Sekretáriu Jerál interinu Partidu CNRT, Jacinto Rigoberto nia-naran, relasiona ho grupu deskoñesidu ne'ebé halo ameasa ba Konselleiru Másimu Partidu KHUNTO, José dos Santos 'Naimori' Bucar. 

"Pesoál Deputada Olinda Guterres mak temi ema nia-naran, maibé iha momentu ne'ebá ha'u rasik la temi A ka B. Maibé ha'u so dehan de'it katak grupu deskoñesidu uza arma hodi halo ameasa ba ami-nia Konselleiru Másimu Partidu Khunto José dos Santos iha nia-rezidensia Maneluana," dehan Deputadu KHUNTO, Luis Roberto, iha sede Partidu KHUNTO, Manleuana, Kinta (30/4).

VIDEO PUBLISIDADE APELU HUSI PM TAUR APLAUS BA FRONT LINE

 

Vise Prezidente Parlamentu Nasional husi Partidu KHUNTO ne'e dehan, laiha orientasaun ba deputada Olinda Guterres katak A ka B mak halo, maibé momentu ne'e akontese duni, maibé grupu deskoñesidu, la'ós Jacinto ho nia grupu.

Nia afirma, prosesu legál la'o nafatin, bele lori ba tribunal.

"Haree ba naran di'ak, ami hanoin tuir prosesu legál ne'ebé iha, ha'u fiar katak señor Jacinto mós iha direitu para atu levanta kazu ne'e to'o tribunal," nia dehan.

Nia mós akresenta, deputada Olinda mós iha obrigasaun ba hataan iha tribunal.

"Pesoál deputada Olinda Guterres mós bele ba hataan iha tribunal, tanba ita ema labele akuza ema sem faktu," dehan Luis. (*)

 

Rate this item
(0 votes)
Last modified on Saturday, 09 May 2020 14:31
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.