Vise Prezidente PN II, Luis Roberto hateten, komunikasaun entre Meza PN ne'ebé lidera husi Arão Noé kotu bainhira bankada FRETILIN, PLP no KHUNTO aprezenta mosaun destituisaun ba Meza PN.
"Onestu de'it ba públiku katak komesa husi loron 4 Maiu (2020) to'o agora membru Meza Parlamentu Nasionál seidauk iha informasaun ba enkontru ka fó informasaun ba malu tanba saida mak paraliza funsionamentu PN," dehan nia, iha Uma Fukun PN, Tersa (12/5).
Nia afirma, bainhira Prezidente PN paraliza funsionamentu PN, membru meza PN la hatene informasaun.
VIDEO PUBLISIDADE APELU HUSI PM TAUR APLAUS BA FRONT LINE
"Ami vise de'it mós la hatene. Ami nu'udar membru meza mós la hatene tanba saida mak akontese buat ne'e," dehan Luis.
Tuir nia, loloos Arão Noe de Jesus labele lori ninia interese pesoál hodi paraliza funsionamentu PN.
"Tuir loloos Prezidente PN labele lori pesoál hodi paraliza tiha funsionamentu PN, maibé hodi orgaun ida ne'e para komunikasaun ho ami para bele asesu ba informasaun ruma hodi fahe ba deputadu sira," nia tenik.
Deputadu ne'e mós rekoñese, durante ne'e membru Meza PN lakon tiha komunikasaun, liuliu ho Prezidente Parlamentu Nasionál rasik.
"Durante ne'e ami nia komunikasaun lakon tiha, la hatene Prezidente PN iha ne'ebé, ami vise sira mós mai iha ami-nia gabinete, ami buka ami-nia prezidente iha ne'ebé nem fó informasaun ba ami," dehan Luis.
Husi komunikasaun entre prezidente PN no Vise Prezidente PN sira ne'e hanesan atu ida paraliza funsionamentu Parlamentu Nasionál.
Antes ne'e, Bankada Parlamentár FRETILIN, PLP no KHUNTO, iha Tersa (5/5) hatama pedidu hodi troka Meza Parlamentu Nasionál.
Pedidu ne’e hato’o tuir dalan ne’ebé Rejimentu PN, iha Artigu 16-B, kona-ba Destituisaun Prezidente PN, tanba nu’udar membru parlamentu lakon ona konfiansa ba Arão Noe nu’udar Prezidente PN.
PUBLISIDADE
"Ami lakon konfiansa ba Arão Noe tanba husi kedas tempu bainhira V Lejizlatura ne’e hahú, Parlamentu Nasional hatudu iha difisiénsia maka’as iha Parlamentu Nasionál nia funsionamentu", haktuir husi komunikadu ne'ebé www.tempotimor.com asesu.
Difisiénsia ne’e tanba husi tinan-2018 to’o ohin loron, PN seidauk konsege finaliza lei importante no nesesariu sira hanesan Lei Anti Korrupsaun. PN la konsege finaliza Lei importante ne’e liu tinan rua ona, tanba inkapasidade Prezidente PN atu haka’as-aan no lidera hodi garante funsionamentu normál PN.
Tuir karta ne'e, maioria husi sesaun plenária parlamentu nian hala’o de'it no periódu antes de orden do dia. Tanba PN laiha ajenda propriu ba sesaun plenaria sira husu inkapasidade.
Parlamentu Nasionál nia lala'ok iha tinan rua (2) ikus ne’e hatudu momoos katak Arão Noe laiha kapasidade", dehan iha karta ne'e.
Nune'e, bankada tolu ne'e lakon konfiansa ba Arão, nu’udar Prezidente Parlamentu Nasionál tanba dala barak liu komporta liu fali hanesan Prezidente Bankada CNRT.
PUBLISIDADE
Iha loron (27/4), Arão Noe, hatudu momoos karakter ne’e bainhira demonstra ninia falta de sentidu solidariedade institusionál entre órgaun Estadu sira iha plenária PN.
Nu’udar Prezidente PN reprezenta partidu hotu-hotu ne'ebé hetan asentu iha PN, Arão partisipa iha reuniaun Konsellu Estadu ne’ebé Prezidente Repúblika konvoka no apoiu estensaun Estadu Emerjénsia.
Baze ba ne’e maka Prezidente Repúblika husu autorizasaun mai PN atu estende Estadu Emerjénsia. Maski nune’e, iha sesaun plenária PN ba votasaun ba pedidu ne'e Arão vota kontra.
Ne’e hatudu momoos ninia inkonsisténsia no inkoerénsia nu’udar polítiku no nu’udar lider ba órgaun soberanu Estadu nian, no hahalok ne’e tau iha kestaun ninian integridade nu'udar Prezidente PN.
La'ós ne'e de'it, loron hirak ikus ne’e deputadu sira nota Prezidente PN halo boikota ba funsionamentu normál PN. Arão halo ne’e liuhusi la konvoka reuniaun lider bankada iha semana kotuk. (*)
