"Ha'u vizita ona média barak ho razaun Governu ne'ebé tutela iha asuntu kominkasaun sosiál sei fó atensaun bá média atu fó informasaun edukativu, kredivel no kualidade atu eduka povu hatene saida mak demokrasia , no saida mak akontese iha mundu," dehan nia, iha Redasaun Lafaek News, Kinta (30/7).
Iha vizita ne'e, governante mós husu ba Lafaek News atu halo aproximasaun ho Ministeru Solidaridade Sosiál no Inkluzaun (MSSI) ho razaun Lafaek News ko'alia barak liu kona-ba problema sosiál.
"Ita haree média online agora avansadu tebes, ho ezistensia média online, média imprimi bele mate," dehan ministru, iha vizita Lafaek News.
Iha fatin hanesan, Diretór Lafaek News, Floriano Soares hateten, kontente tanba ministru halo vizita ba media ne'e.
Nune'e, Xefe Redasaun Lafaek News, Acasio Pinto, hato'o ba ministru nia vizita katak, maski Lafaek News foin mosu halo fulan ualu, maibe ho tempu badak sei planu atu halo lansamentu.
"Durante Covid ami halo koobertura kona-ba kbi'it la'ek sira, alende ne'e ami mós halo asaun karidade hodi ajuda ai-han ba sira no osan sira ne'e ami hetan husi leitor sira husi Koreia no Inglaterra," tenik Xefe Redasaun.
Tuir nia, Lafaek News, durante ne'e la'ós mete de'it ba polítiku maibé haree mós ba notisia lian husi povu.
"Ami la husu buat barak maibé oinsá mak Governu atu ajuda publisidade tanba publisidade mak bele hamoris ami," dehan nia.
Enkuantu, iha Lafaek News kompostu husi Jornalista hamutuk 25 inklui xefe redasaun no Diretór. (*);