Ministru Obras Públika (MOP), Salvador Soares dos Reis Pires resposta prekupasaun deputadu sira relasiona ho Bé no Saniamentu hodi hatete iha verba 3 milloens bens servisu ba manutensaun be mos sira.
Salvador esplika, bainhira iha 2018 hahu asume knar MOP, iha ativus ne'ebé konstruidu husi guvernu anterior sira, mill seisentus eital estasaun bé ne'ebé husi dadus 2015 sistema informasaun baze ba agua i saniamentu purvolta 44% setisentus eital estasaun deit mak diak. Tanba ne'e iha 2019 MOP preve orsamentu refere para halo manutensaun ba iha estasaun sira ne'ebé mak aat ona.
Maibe tuir guvernante hatete, presija iha investementu ba setor bé iha tinan 2021 mai hanesan projeitu inklui rehabilitasaun nune'e komunidade sira bele asesu ba bé mos.
"Ita presija halo investementu iha duni setor refere (bé mos) i iha 2021 ami hanoin katak promove tan projeitu foun, rehabilitasaun ba iha setor ne'e, atu nune'e ita bele fo asesu barak liu tan ba iha komunidade," dehan Salvador iha Parlamentu nasional Dili, Kuarta (7/10).
Salvador hatutan, Iha obras publika koalia ona kona ba mudansa iha setor bé mos, nune'e presija iha investementu. Tanba tuir membru ezekutivu ne'e, bainhira investimentu osan laiha entaun hela ba planu deit maibe labele realija tanba guvernu laiha osan.
"Iha 2021 espera katak ita bele halo investementu foun iha area refere atu hadia fornesementu bé ba ita nia komunidade sira," dehan Salvador
Antes ne'e, deputada CNRT, Virgínia Ana Belo akresenta ba Ministru obras publika relasiona ho planu fornesementu bé ba komunidade sira, tuir Bendita komunidade sira susar ba bé mos laos iha area rural deit maibe iha Kapital Dili mos komunidade barak mak sei susar asesu ba bé mos.
Nune'e nia parte espera ho orsamentu 3 milloens ne'ebé aloka ba kustu manutensaun bele ajuda normaliza bé mos ba komunidade inklui orsamentu 10 milloens ne'ebé sei utilija ba estudu hanesan estrada no distribusaun bé mos bele utilija mesmu ho durasaun tenpu ne'ebé naton.
"Ami espera katak ho orsamentu 3 milloens bele ajuda sira pelumenus normaliza bé, liuliu bé ba ita nia populasaun sira liuliu iha Dili laran no mos fatin seluk hamesan iha Munisipiu," dehan Virgínia.
Entertantu OJE ba MOP passa bainhira deputadu sira vota afavor 43, kontra 9 no abstensaun 12 h. total OJE ba tinan fiskál 2020 hamutuk millaun $195.423, fahe ba Saláriu Vensimentu: $5.022, Bens no Servisu: $182.877, Transferénsia Públika 0, Kapitál Minór: $2. 524 no Kapitál Dezenvolvimentu: $5.000.
