Ministru Koordenadór ba Asuntu Ekonomia (MKAE) Joaquim dos Santos ko’alia lia hirak ne'e iha salaun Delta Nova, hafoin fó mensajen ba timoroan sira ne'ebé atu ba halo servisu liuhusi programa Seasonál Workers Program (SWP) iha Austrália.

"Ha'u hanoin ema Timor la'ós halo resposta ba iha asuntu sira ne'ebé ita bele ko'alia ne'e ho medida violentu, ne'e la'ós karakter Timor. Ita pasa husi nasaun pos konflitu, iha 1999, milisia nia atetude mak ida sunu ne'e, buat kiik-boot, resposta ho sunu," Ministru Joaquim dehan iha Delta Nova, Tersa (01/12).

Governante ne'e mós dehan, Timor-Leste, agora nasaun demokrátiku, tanba ne'e bele ko'alia no halo keixa.

"Ita agora nasaun demokrátika, ita bele ko'alia, hato'o keixa, inklui programa Sesta Bázika ne'e mós iha meza reklamasaun, entaun ha'u hanoin sei iha dalan atu ko'alia, rezolve pasifikamente, ita labele rezolve buat hotu ho ahi," nia kondena.

Nia mós husu ba komunidade ne'ebé hakarak rezolve ho ahi ne'e, atu hanoin didi'ak, tanba la'ós ladi'ak ba balun de'it, maibé ba ema hotu, inklui sira, tanba rezolve ho ahi, la'ós kultura Timor nian.

Entretantu kazu ne'e akontese tanba, komunidade deskonfia governu no kompañia halo kon-kali-kon ba presu sasan nian.

Akontesimentu ne'e mosu iha munisípiu Vikeke, postu Lakluta, iha semana ne'e bainhira Ministériu Koordenadór ba Asuntu Ekonomia (MKAE) Joaquim dos Santos halo lansamentu ba progrma sesta bázika ne'ebé Sentru Lojístika Nasionál (SLN) prepara iha postu administrativu Lakluta.(*)