Kandidatu traballadór ba Korreira Súl, José dos Santos hateten, sira hamutuk ema na'in 465 mak dokumentus kompletu ona, maibé too agora sidauk iha informasaun husi SEFOPE konaba bainhira mak ba servisu iha Korreia Súl.
"Ami nia dokumentu sira hanesan Viza ho osan sira ne'e kompletu hotu ona, no hein de'it atu ba, maibé to'o agora ami nunka rona data loloos atu ba ne'e, bainhira. Tanba ne'e maka ohin ami mai hasoru sira hodi husu ba sira atu fó data fiksu ba ami", kandidatu traballadór ba Korreia Súl, José dos Santos hateten iha Kaikoli, Kinta (03/12).
Nia mós informa, entre sira na'in 465 ne'e, na'in 37 mak kompleta ona prosesu administrativu ne'ebé kada ema hatama $2000 hodi hein desizaun husi SEFOPE atu ba servisu iha Korreia Súl.
"Ami 37 pesoas maka hatama ona osan ho montante $2000. Atu selu Aviaun. Maibé, viza sai hotu ona, só ke to'o agora mak seidauk aranka ba Korreia", nia dehan.
Kandidatu traballadór sira nee mós kestiona kona-ba aviaun ne'ebé atu tula sira ba Korreia, sira rasik mak aluga fali.
Tuir observasaun www.tempotimor.com iha terrenu nota katak, ezíjensia traballadór sira ne'e hato'o direta ba Sekretáriu Estadu Formasaun Profesionál no Empregu (SEFOPE), maibé laiha solusaun pozitiva ruma ba traballadór sira, no promete mós atu iha tempu badak sei buka solusaun hamutuk liuhusi diálogu ho kandidatu sira. (*)
