Ministru Prezidénsia Konsellu Ministru Fidelis Leite Magalhaes informa, Projetu Dekretu-Governu nian ne'e aprezenta husi Ministru Turizmu, Komérsiu no Indústria, José Lucas do Carmo da Silva no hetan duni aprovasaun husi konsellu ministru.
"Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu-Governu nian ne’ebé aprezenta husi Ministru Turizmu, Komérsiu no Indústria, José Lucas do Carmo da Silva, kona-ba alterasaun dahuluk ba Dekretu-Lei n.12/2019, loron 14 fulan-juñu, kona-ba Orgánika Ministériu Turizmu, Komérsiu no Indústria", Fidelis hateten hafoin reuniaun konsellu ministru iha palásiu governu, Kuarta (09/12).
Aleinde alterasaun hirak ne’ebé aprova ona iha sorumutuk Konsellu Ministru nian iha loron 20 fulan-novembru tinan 2020, projetu dekretu ne’e agora aprova ona hodi rekoñese kompeténsia tranzitória Ministériu Turizmu, Komérsiu no Indústria nian hodi halo kontratasaun pesoál ba merkadu Taibesi no merkadu Manleuana nian. (*)