Eis-Prezidente Parlamentu Nasional Arao Noe de Jesus Amaral hateten, projetu 144 ne'ebé daudaun problema iha prosesu pagamentu ne'e, tanba kontratu iha, maibe BOQ mak laiha.
"Horseik debate orsamentu iha Ministeriu obras publika nian laiha deputadu ida kestiaona kona-ba projetu ne'ebe la'o daudaun", Nia dehan iha bankada CNRT Parlamentu Nasional, Sesta (11/12).
Arão argumenta, dadus ne'ebe CNRT hetan purvolta 162 projetu iha tinan 2019 no 2020 nian to'o agora iha hela problema nia laran.
"Problema, tanba kontratu iha la tuir BOQ no dezeñu, BOQ ho dezeñu laiha, maibé kontratu iha tiha ona, no kontratu halo tiha ona ho presu unitáriu la tuir presu estandar ne'ebé governu estabelese ona tuir dekretu governu nian, tanba ne'e ADN lakohi halo verifikasaun projetu hirak ne'e, tanba la kumpri regras Lei ne'ebé estabelese," nia esklarese.
Tuir nia, agora projetu hirak ne'e mosu hela konfuzaun, tanba ne'e mak CNRT identifika problema.
"Husi projetu 162, daudaun 144 mak iha hela prosesu pagamentu, ida ne'e mak problema ne'ebé iha, ami sei buka hela dadus, se hetan dadus kompletu sei lori ba prosesu legal, ami kompromete kedas projetu 162 no 144 ne'ebé iha hela problema prosesu pagamentu", nia dehan.
Nia mós akresenta, iha problema seluk mak, projetu balun tau iha orsamentu bens servisu hodi finansia projetu sira.
"Dadus ami komesa rekolla, eh tama mos iha projetu 162, ida ne'e mak sei sai problema, ne'e mak ami hakarak lori ba prosesu ne’ebé iha relasaun ba 162 projetu ne'ebé iha," nia afirma.
Nia relata katak, iha mós problema seluk ne’ebé mai husi Xefe bankada CNRT katak, governu agora komesa halo uluk ona kontratu ho kompañia, maski Orsamentu Jeral Estadu (OJE) tinan 2021 seidauk aprova.
"Rona informasaun balun projetu la'o tiha ona, mezmu orsamentu seidauk aprova, mas prosesu balun komesa fahe ona projetu, tender loke tiha ona, se ida ne'e sein orsamentu, ida ne'e mak irregularidade barak ami deteta iha prosesu tenderizasaun ba projetu sira", nia dehan. (*)