Xefe suku Fahisoi Filomena Soares hateten, formasaun ne'ebé IDN fó importante tebes, tanba bele ba aplika iha suku no konsege reduz konflitu iha suku laran.
"Formasaun ne'e di'ak tebes, tanba ajuda ami oinsa atu aplika iha ami-nia suku inklui servisu hamutuk di'ak liután husi governu sentrál no ami xefe suku sira iha baze," Xefe suku Fahisoi Filomena hateten iha CCD, Dili, Segunda (21/12).
Autoriedade lokál ne'e afirma, formasaun dahuluk ne'ebé xefe suku sira tuir, parte suku Fahisoi aplika duni.
"Matéria iha formasaun dahuluk ne'e ami lori ba aplika duni, entaun problema sira komesa redúz, ema barak hahú tuir lei no koopera ba justisa, tanba ne'e ami husu atu kontinua nafatin formasaun ne'e, tanba ami-nia maluk balun ne'ebé foin foun seidauk iha esperiénsia, tanba ne'e presiza iha kontinuasaun," nia sujere.
Iha fatin hanesan, xefe suku Fahilebu mós agradese ba IDN, tanba bele apoiu ona koñesimentu importante ne'ebé liga ba povu nia moris.
"Ami kontente, tanba formasaun ida ne'e di'ak tebes ba ami, tanba hasa'e lider lokál sira-nia koñesimentu, hodi nune'e ami bele habelar fila fali ba ami-nia povu kona-ba dezenvolvimentu suku nian," nia dehan.
Entretantu, matéria sira ne'ebé durante ne'e xefe suku sira hetan mak liga liu ba krize ne'ebé mosu iha suku, hanesan dezestre naturais, ameasa hanesan pandemia corona virus.
Alende ne'e Koordenadór Kursu Seguransa Defeza Nasionál IDN Nuno Corvelho Sarmento mós garante katak, husi formasaun ne'ebé iha ne'e bele ajuda ona sira.
"Husi formasaun ne'e, sira bele jere ona sira-nia suku, tanba ne'e atu kontinua ba oin ne'e, ami sei iha progrma oioin oinsa atu fó kapasitasaun di'ak liután lider lokál sira iha futuru," nia tenik.(*)