Inisiativa hari'i kooperativa ne'e mosu husi jerasaun sira iha uma-lisan Besilau-Baulelo kompostu husi maun ho alin hamutuk nain sanulu ne'ebé hamosu inisiativa rasik hodi harii Kooperativa Paulo de Jesus (KPJ) iha suku Dato, postu administrativu Likisá, munisípiu Likisá.

Prezidente Kooperativa Paulo de Jesus (KPJ), Ladislau Maria das Dores de Jesus hateten, sira nia planu hari'i kooperativa ne'e, hahú antes tiha ona oinsá mak atu harii kooperativa ida entre sira iha família uma-laran, maibé mehi ba inisiativa ida ne'e foin realiza iha iha fulan agostu tinan 2020.

Nia haktuir, iha loron 20 fulan Agostu, sira maun-alin kompostu husi mane nain-sanulu ho feto nain-sanulu husi uma-lisan Besilau-Baulelo halao sorumutuk ida iha uma-lisan hodi fó hanoin ba malu atu harii kooperativa ida iha família, no loron 9 fulan Novembru sira hetan formasaun husi ekipa formadór SEKoop nian husi nasionál.

“Liuhusi aklamasaun, hotu-hotu hakarak tau naran avo Paulo de Jesus, hanesan naran ba kooperativa ne'e ho atividade kooperativa rai osan nu'udár atividade prinsipál. Iha sorumutuk ne'e, deside mós katak kooperativa sei hala'o ninia operasaun iha munisípiu Likisa, nomós munisípiu 12 iha teritóriu laran tomak”, nia esplika.

Nia esplika, objetivu harii Kooperativa Paulo de Jesus (KPJ), atu hasae no dezenvolve ekonómia família, fó empréstimu ba membru sira hodi hadi'a ekonómia uma-laran, membru sira bele investe hodi hetan lukru ka funan hodi hasa'e kresimentu ekonómika no rendimentu famíliar, apoiu no fasilita jerasaun família no komunidade hodi asesu ba servisu, haburas atitude poupansa no uza osan ho kuidadu tuir planu ne'ebé aprova husi membru sira.

“Vizaun hari'i kooperativa Paulo de Jesus (KPJ) maka, família ida-idak moris di'ak liu, husi dezenvolvimentu kooperativa kréditu ne'ebé populár, ekonómiku no sustentável”, Prezidente KJP hato'o relatóriu iha serimónia toma-de-posse husi SEKoop ba membru iha rezidénsia atuál Ministu Defeza (MD), Filomeno da Paixão de Jesus iha suku Dato, postu administrativu Likisá Villa, Tersa (22/12).

Kona-ba misaun, nia dehan atu dezenvolve kooperativa kréditu ne'ebé orienta ba investimentu produtivu, fasilita oportunidade asesu ekonómia no dudu dezenvolvimentu famíliar, promove ekonómia famíliar ne'ebé autu-sufisiente no independente, promove solidariedade sosial ba membru kooperativa kréditu sira, inklui mós atu promove edukasaun ne'ebé adekuadu ba membru hotu-hotu.

Nia esplika, simbólu kooperativa nian maka naran no figura Paulo de Jesus nian iha sirkulu nia laran reprezenta família Jesus husi sira nia uma-lisan Besilau-Baulelo, fitun rua-nulu reprezenta família feto-mane sanulu, nunee mós reprezenta sosiedade kooperativa kréditu, kór osan-mean reprezenta negósiu kooperativa ekonómia no prosperiedade.

Lema husi KPJ maka fó liman ba malu hodi hakbiit ita-nia aan, fó liman ba malu signifika atu halinur no tau forsa hamutuk hodi atinje mehi ida, bolu malu hodi halao servisu, bolu malu hodi fó hanoin ba servisu maka'as hodi atinje mehi ida.

“Hakbi'it ita nia-aan, signifika hasa'e ita nia kapsidade iha parte ekonómia no sosiál, kooperativa sai boot no fó benefísiu ba membru tomak, fó esperansa ba membru sira atu hetan prosperiedade iha futuru hodi hakbi'it kapasidade membru sira”, nia hateten tan.

Entretantu, estrutura husi kooperativa Paulo de Jesus (KPJ) nian sira hili, José Barreto de Jesus, Filomeno da Paixão de Jesus ho Rui Paulo Tavares de Jesus sai hanesan konsellu konselleiru.

Konsellu dirijente kompostu ho nia prezidente maka Ladislau Maria das Dores de Jesus, vise prezidente maka Carolina Guterres Pereira de Jesus, tezoureira dahuluk (Maria José dos Martires de Carvalho), tezoreira daruak (Palmira Varella), sekretáriu dahuluk (Anita Tavares de Jesus), sekretáriu daruak (Osvaldo Ximenes de Jesus), membru maka (Miguel Ximenes de Jesus).

Konsellu Fiskais nia prezidente lídera husi Justiano Rodriguês de Jesus, sekretáriu Deonízio António de Jesus, membru maka Paulo de Jesus.

Komíte kréditu ninia prezidente maka (Amélia Setio Rini de Jesus), Sekretária (Maria Filomena de Jesus Mota), no membru maka Cesaltino Ximenes de Jesus, no husi Komite edukasaun nian maka, Natalino Rodriguês de Jesus ho Fernando Oliveira de Jesus.(*)